فلسطین کے مقبوضہ مغربی کنارے میں اسرائیلی فوجیوں نے جمعرات کو علی الصباح گولیاں مار کر ایک اور فلسطینی نوجوان کو شہید کردیا۔ جس کے بعد یکم اکتوبر سے جاری تحریک انتفاضہ القدس کے دوران شہداء کی تعداد 100 ہوگئی ہے۔
رپورٹ کے مطابق جمعرات کو علی الصباح اسرائیلی ملٹری پولیس نے رام اللہ کے قریب میڈیکل کمپلیکس کے باہر ہونے والے احتجاجی مظاہرے کے دوران ایک فلسطینی نوجوان کو گولیاں ماریں جس کے نتیجے میں 21 سالہ یحیٰی یسری طہ موقع پر ہی شہید ہوگیا۔ وزارت صحت کے مطابق طہ کے سرمیں گولیاں لگیں جو جان لیوا ثابت ہوئیں۔خیال رہے کہ فلسطین میں یکم اکتوبر کے بعد سے جاری تحریک انتفاضہ کچلنے کی اسرائیلی ظالمانہ پالیسی کے نتیجے میں اب تک 100 فلسطینی شہید کیے جا چکے ہیں۔ شہداء میں 22 بچے بچیا اور 4 خواتین شامل ہیں۔
قطنہ قصبے کی میونسپل کارپوریشن کے چیئرمین نے بتایا کہ اسرائیلی فوجیوں کی کئی گاڑیوں نے جمعرات کو نماز فجر کے بعد قصبے پر دھاوا بولا، جس پر فلسطینی شہری احتجاج کرتے ہوئے گھروں سے باہر نکل آئے۔ اسرائیلی فوجیوں نے مظاہرین کو منتشر کرنے کے لیے ان پر گولیاں چلائیں۔ کچھ گولیاں ایک فلسطینی نوجوان کےسر اورسینے میں لگیں جس کے نتیجے میں وہ جام شہادت نوش کرگیا۔