فلسطین کی نمائندہ مذہبی اور سیاسی جماعتوں نے آج جمعہ کو صہیونی ریاستی دہشت گردی کے خلاف "یوم الغضب” کے طور پرمنانے کی اپیل کی ہے۔ تاجر برداری اور دیگر شہری تنظیموں نے بھی یوم الغضب کے حوالے سے منعقدہ ریلیوں میں بڑھ چڑھ کر حصہ لینے کا اعلان کیا گیا ہے۔
رپورٹ کے مطابق اسلامی تحریک مزاحمت "حماس” ، اسلامی جہاد اور عوامی محاذ برائے آزادی فلسطین سمیت کئی مذہبی اور سیاسی جماعتوں نے آج پورے ملک میں انتفاضہ القدس کی حمایت اور اسرائیلی دہشت گردی کے خلاف احتجاجی مظاہروں کا اعلان کیاہے۔حماس کی جانب سے جاری ایک بیان میں فلسطینی عوام سے اپیل کی گئی ہے کہ وہ "یوم الغضب” کی مناسبت سے منعقدہ ریلیوں کو کامیاب بنانے کے لیے ان میں بڑھ چڑھ کر حصہ لیں۔ حماس نے غزہ کی پٹی، مغربی کنارے اور بیت المقدس کے عوام سے خاص طورپر یہودی دہشت گردی کے خلاف گھروں سے باہر نکل کر احتجاجی مظاہروں میں حصہ لینے کا مطالبہ کیا۔
بیان میں کہا گیا ہے کہ فلسطینی عوام اس وقت دفاع قبلہ اول کی فرنٹ لائن پرجنگ لڑ رہے ہیں۔ اس لیے تمام فلسطینی "یوم الغضب” کے موقع پر مظاہروں میں شرکت کرکے نہ صرف دفاع قبلہ اول کے لیے اپنا فرض پورا کریں بلکہ صہیونی جارحیت کے نتیجے میں شہید اور زخمی ہونےوالے شہریوں اور ان کے لواحقین کے ساتھ مکمل یکجہتی کا اظہار کریں۔
اسلامی جہاد اور عوامی محاذ برائے آزادی فلسطین نے بھی آج جمعہ کو فلسطین کے مختلف شہروں میں دفاع قبلہ اول ریلیاں نکالنے کا اعلان کیا ہے۔ دونوں جماعتوں کی جانب سے جاری الگ الگ بیانات میں فلسطینی شہریوں سے "یوم الغضب” کے مظاہروں کو کامیاب بنانے کا مطالبہ کیا گیا ہے۔