اسرائیل کے دارالحکومت تل ابیب [تل الربیع] میں ایک فلسطینی نوجوان نے چھری کے مسلسل وار کرکے چار یہودی آباد کاروں کو زخمی کردیا۔ پولیس کی فائرنگ سے حملہ آور بھی شہید ہوگیا ہے۔
اسرائیل کے عبرانی ریڈیو نے اپنی رپورٹ میں بتایا ہے کہ ایک فلسطینی نوجوان نے اسرائیلی فوج کی ایک خاتون اہلکار "جادہ مناحیم بیگن” پر اسرائیل کے آرمی ہیڈ کواٹر کے قریب "ھکریاہ” کے مقام پر حملہ کیا جس کے نتیجے میں وہ شدید زخمی ہوئی ہے۔ اسی فلسطینی نے تین دوسرے یہودی آباد کاروں کو بھی چھری کے وار سے زخمی کیا ہے۔ پولیس نے فرار ہوتے فلسطینی نوجوان کو گولیاں ماریں جس کے نتیجے میں وہ جام شہادت نوش کرگیا۔اسرائیلی ریڈیو کا کہنا ہے کہ فلسطینی نوجوان نے یہودی فوجی خاتون کو چھری کے حملے میں زخمی کرنے کے بعد اس کا اسلحہ بھی چھین لیا اور "عزرائیل” ٹاور کی جانب فرار ہوا اور راستے میں مزید تین یہودی آباد کاروں کو چھریوں کے حملے میں زخمی کردیا۔ پولیس نے فلسطینی نوجوان کا تعاقب کیا اور اسے راستے ہی میں گولیاں مار کرشہید کردیا۔ آخری اطلاعات تک شہید ہونے والے فلسطینی کی شناخت ظاہر نہیں کی گئی۔