مرکزاطلاعات فلسطین کے مطابق منگل کو علی الصباح ہزاروں ایتھوپیائی خواتین، بچے اور جوان اسرائیلی دارالحکومت تل ابیب میں سڑکوں پرجمع ہوئے اور صہیونی حکومت کے خلاف احتجاج کیا۔
مظاہرین نے ہاتھوں میں پلے کارڈز اٹھا رکھے تھے جن پر”ہم ظلم پرخاموش نہیں رہیں گے” کے نعرے درج تھے۔ مظاہرین نے صہیونی حکومت کی ظالمانہ پالیسیوں کے خلاف شدید نعرے بازی بھی کی۔
اسرائیل کے عبرانی زبان میں نشریات پیش کرنے والے ٹیلی ویژن 7 کی رپورٹ کے مطابق منگل کو سیکڑوں ایتھوپیائی سیاہ فام یہودیوں نے اپنے ساتھ ہونے والی نا انصافیوں کے خلاف احتجاج کیا اور حکومت پر کڑی تنقید کرتے ہوئے الزام عاید کیا کہ تل ابیب حکومت یہودیوں کے ساتھ بھی نسلی امتیاز کا مظاہرہ کررہی ہے۔
خیال رہے کہ گذشتہ روز اسرائیلی صدر رئوف رفیلین نے اعتراف کیا تھا کہ حکومت ایتھوپیائی یہودیوں کو اسرائیلی سماج میں برابری کا مقام دلانے میں ناکام رہی ہے۔
پچھلے ماہ ایتھوپیائی یہودیوں نے اس وقت احتجاجی مظاہرے شروع کردیے تھے جب یہودی پولیس اہلکاروں نے ایتھوپیائی فوجی کو تشدد کا نشانہ بنایا تھا۔ اس واقعے کے بعد پرتشدد مظاہرے شروع ہوگئے تھے جن میں پولیس اہلکاروں سمیت درجنوں افراد زخمی ہوگئے تھے۔ بعد ازاں پولیس نے تشدد کے الزام میں چھ یہودیوں کو حراست میں بھی لیا تھا۔
واضح رہے کہ اسرائیل میں ایتھوپیائی نسل کے یہودیوں کی تعداد ایک لاکھ 25 ہزار پانچ سو ہے اور ان میں سے 5400 یہودی فوج میں بھی خدمات انجام دیتے ہیں۔۔
بشکریہ:مرکزاطلاعات فلسطین