فلسطین فاؤنڈیشن پاکستان اور حقوق انسانی کمیشن برائے پاکستان سمیت پائیلر اور دیگر اداروں کا مشترکہ اجلاس ،صابر ابو مریم، کرامت علی، اسد بٹ، شمس الدین، شرافت علی، عباس حیدر سمیت دیگر کی شرکت
کراچی( )فلسطین فاؤنڈیشن پاکستا ن کے تحت غاصب اسرائیل کے ناپاک وجود کے قیام کے خلاف ’’یوم نکبہ‘‘ کی مناسبت سے جاری ’’فلسطین واپسی‘‘ مہم کے تحت گذشتہ روز فلسطین فاؤنڈیشن پاکستان اور ہیومن رائٹس کمیشن آف پاکستان سمیت انسانی حقوق کے دفاع کے لئے سر گرم عمل غیر سرکاری تنظیموں بشمولPILER, PIA Skyways, SFSP, PIPFPD, AHRC, MLFPسمیتPFFاور دیگر کے نمائندوں کا مشترکہ اجلاس حقوق انسانی کمیشن برائے پاکستان کے دفتر میں منعقد ہوا جس میں فلسطین فاؤنڈیشن پاکستان کے مرکزی سیکرٹری جنرل صابر ابو مریم اور انچارج میڈیا سیل فلسطین علی احمر نے شرکت کی جبکہ اس موقع پر دیگر اداروں کے نمائندگان میں کرامت علی، شرافت علی، شمس الدین، اسد بٹ اور عباس حیدر سمیت دیگر شریک تھے۔فلسطین فاؤنڈیشن اور انسانی حقوق کی تنظیموں کے مشترکہ اجلاس میں فلسطینیوں کے حقوق اور بالخصوص فلسطینیوں کے حق واپسی کے حوالے سے بحث کی گئی اور اس بات کا اعلان کیا گیا کہ انسانی حقوق کی تنظیموں اور فلسطین فاؤنڈیشن پاکستان کے زیر اہتمام 14مئی بروز جمعرات کو کراچی پریس کلب کے باہر چار بجے فلسطینیوں کے حق میں احتجاجی مظاہرہ کیا جائے گا۔واضح رہے کہ سنہ1948ء کو 14مئی کے دن ہی عالمی استعماری قوتوں برطانیہ اور امریکہ کی سرپرستی میں غاصب صیہونی ریاست اسرائیل کا قیام سرزمین فلسطین پر عمل میں لایا گیا تھا جس کے بعد سے مظلوم فلسطینیوں پر نہ صرف انسانیت سوز مظالم کا سلسلہ شروع ہو ابلکہ فلسطینیوں کو لاکھوں کی تعداد میں انکے گھروں سے بھی جبری طور پر نکال دیا گیا جو آج 67برس بیت جانے کے باوجود اپنے وطن واپس جانے سے محروم ہیں۔