مرکزاطلاعات فلسطین کے مطابق حماس کے سیاسی شعبے کے سینیر رکن عزت الرشق نے اپنے ایک بیان میں کہا کہ بیت المقدس میں فلسطینیوں کے مکانات کی مسماری، مقدس مقامات پر یہودیوں کے حملے اور فلسطینی شہریوں پر ڈھائے جانے والے مظالم صہیونی ریاست کی کھلی ریاستی دہشت گردی کا ثبوت ہیں۔
انہوں نے کہا کہ اسرائیل فلسطینیوں کے مکانات مسمار اور ان کی جائیدادیں تباہ کرکے بیت المقدس سے انہیں نکل جانے پرمجبور کررہا ہے تاکہ فلسطینی قبلہ اول کے دفاع سے دور ہوجائیں لیکن اسرائیل کی یہ سازشیں کبھی کامیاب نہیں ہوں گی۔
حماس رہ نما نے اسرائیلی وزیر برائے ہائوسنگ ’’اورے آرائیل‘‘ کے اس بیان کو اشتعال انگیز قرار دیا جس میں انہوں نے مطالبہ کیا تھا کہ مسجد اقصیٰ کی مرمت کے کام پرپاپندی عاید کی جائے۔عزت الرشق نے کہا کہ اسرائیلی وزیر کا مسجد اقصیٰ کی مرمت کا کام بند کرانے کا مطالبہ حماقت اور انتہا پسندانہ سوچ کا عکاس ہے۔
انہوں نے کہا کہ حالیہ کچھ عرصے سے اسرائیلی حکام نے بیت المقدس میں فلسطینیوں کے مکانات کی مسماری کا سلسلہ تیز کردیا ہے۔ وادی الجوز میں ایک زیرتعمیر چار منزلہ عمارت کو یہ کہہ کر گرادیا گیا کہ اس کی تعمیر سے قبل حکومت سے اجازت نہیں لی گئی تھی۔
بشکریہ:مرکزاطلاعات فلسطین