مرکز اطلاعات فلسطین کے مطابق مصری عدالت کے فیصلے کے خلاف فلسطین اور لبنان میں احتجاجی مظاہرے ہوئے ہیں جن میں ہزاروں افراد نے شرکت کی ہے۔
فلسطین کی یوتھ اینڈ اسپورٹس فائونڈیشن کی جانب سے جاری ایک بیان میں مصری عدالت کے فیصلے پرحیرت کا اظہار کرتے ہوئے اسے کی شدید مذمت کی گئی ہے۔ بیان میں کہا گیا ہے کہ مصری عدالت کا فیصلہ پوری فلسطینی قوم کی توہین کے مترادف ہے۔ فلسطین کی مزاحمتی تنظیموں کو دہشت گرد گروپ قرار دینا صہیونی ریاست کی مفت میں خدمت بجا لانے کے مترادف ہے۔
ادھر فلسطین میں اسلامی طلباء لیگ کی جانب سے بھی مصری عدالت کے فیصلے کی شدید مذمت کرتے ہوئے عرب اور مسلمان ممالک سے اس فیصلے کو تبدیل کرانے کا مطالبہ کیا ہے۔ غزہ کی پٹی میں طلباء لیگ کی جانب سے ایک احتجاجی مظاہرہ بھی کیا جس میں حماس اور تنظیم کے عسکری ونگ القسام بریگیڈ کے ساتھ مکمل یکجہتی کا اظہار کیا گیا۔
فلسطین میں انسانی حقوق کی تنظیم ’’ثابت‘‘ کی جانب سے بھی مصری عدالت کے فیصلے کی مذمت کی گئی۔ درایں اثناء لبنان کے دارالحکومت بیروت میں سول سوسائٹی نے مصری عدالت کے فیصلے کے خلاف ایک جلوس نکالا جبکہ لبنان کی علماء کونسل کی جانب سے بھی مصری عدالت کے فیصلے کو مسترد کر دیا گیا ہے۔ لبنان میں فلسطین علماء رابطہ گروپ کی جانب سے جاری ایک بیان میں مصری عدالت کے فیصلے کو فلسطینی قوم اور بہادر فلسطینی مجاھدین کے خلاف اعلان جنگ قرار دیا ہے۔
بیان میں کہا گیا ہے کہ مصری عدالتوں کے فیصلے کسی دشمن ملک کی عدالتوں کے فیصلوں کی طرح ہیں۔ جو عدالتیں صہیونیوں کی حمایت میں فیصلے صادر کرتی ہیں وہ اللہ اور اس کے رسول سے خیانت کی مرتکب ہیں۔
بشکریہ:مرکزاطلاعات فلسطین