مرکزاطلاعات فلسطین کے مطابق بیت المقدس میں اسرائیلی میئر نیر برکات نے گذشتہ روز ایک نیوز کانفرنس میں بتایا کہ میراتھن دوڑ کا انعقاد تیرہ مارچ کو ہو گا جس میں مختلف ممالک کے 2200 شہریوں کے علاوہ کم سے کم 25 ہزار افراد شرکت کریں گے۔ میراتھن دوڑ کی میڈیا کوریج کے لیے 60 عالمی ابلاغی اداروں کی ٹیموں کو بھی بیت المقدس میں آنے کی اجازت دی گئی ہے۔
دوسری جانب اقصیٰ فائونڈیشن نے میراتھن دوڑ کے صہیونی ڈرامے کو بیت المقدس کو یہودیانے کی سازشوں کا حصہ قرار دیا ہے۔ اقصیٰ فائونڈیشن کی جانب سے جاری ایک بیان میں کہا گیا ہے کہ میراتھن ریس میں زیادہ سے زیادہ صہیونیوں کو شریک کیا جا رہا ہے جس کا مقصد بیت المقدس پر اسرائیلی قبضے کو جواز فراہم کرنا اور فلسطینی تاریخی حقائق کو جھٹلانے کا نیا ڈھونگ رچانا ہے۔
بیان میں کہا گیا ہے کہ اسرائیل اس نوعیت کی سازشوں کے ذریعے بیت المقدس کو صہیونی ریاست کا دارالحکومت قرار دلوانے کے لیے کوشاں ہے لیکن فلسطینی عوام صہیونی ریاست کی ان سازشوں کو کسی صورت میں کامیاب نہیں ہونے دیں گے۔
بشکریہ:مرکزاطلاعات فلسطین