جزیرہ نقب میں اسرائیلی دہشت گردی، پہیہ جام شٹرڈائون ہڑتال، نظام زندگی مفلوج

فلسطین کے جنوبی علاقے جزیرہ نما النقب میں گذشتہ روز اسرائیلی فوج کے ہاتھوں تین نہتے فلسطینیوں کی شہادت کے خلاف آج کئی شہروں میں پہیہ جام اور شٹر ڈائون ہڑتال جاری ہے جس کے نتیجے میں جزیرہ نقب میں نظام زندگی مفلوج ہو گیا ہے۔ سول سوسائٹی کی اپیل پر کئی علاقوں میں احتجاجی مظاہرے اور ریلیاں بھی نکالی جا رہی ہیں۔

مرکز اطلاعات فلسطین کے مطابق گذشتہ روز اسرائیلی نے ایک فلسطینی نوجوان کے جنازے کے جلوس پر حملہ کر دیا تھا جس کے نتیجے میں دو فلسطینی سامی الجعار اور سامی الزیادنہ شہید اور سیکڑوں افراد زخمی ہوگئے تھے۔ یہ واقعہ جنوبی فلسطین کے جزیرہ نما النقب کے الرھط شہر میں پیش آیا تھا۔ صہیونی فوج کی اس منظم ریاستی دہشت گردی کے خلاف آج جزیرہ النقب سمیت پورے جنوبی فلسطین میں احتجاجی مظاہرے اور ہڑتال جاری ہے۔

الرھط شہر سے مقامی ذرائع نے بتایا کہ انسانی حقوق کی تنظیموں کی اپیل پر شٹر ڈائون کے ساتھ ساتھ جگہ جگہ احتجاجی مظاہرے جاری ہیں۔ پہیہ جام ہڑتال کے نتیجے میں پورے علاقے میں سڑکیں سنسان ہیں۔

الرھط شہر میں سب سے بڑے احتجاجی مظاہرے کا اہتمام کیا گیا ہے جس میں آس پاس کے شہروں سے بھی مقامی فلسطینی ریلیوں کی شکل میں شرکت کر رہے ہیں۔

ذرائع کے مطابق اسکولوں میں طلباء نے بھی کل منگل کو تعلیمی بائیکاٹ کرتے ہوئے صہیونی فوج کی ریاستی دہشت گردی کے خلاف احتجاج کرنے کا اعلان کیا ہے۔

ادھر جنوبی فلسطین کے شہر حیفا اور وادی النسانس میں بھی طلباء تنظیموں اور سول سوسائٹی کی اپیل پر آج احتجاجی مظاہرے ہو رہے ہیں۔ ایک بڑا احتجاجی جلوس حیفا کے مرکزی علاقے المکر سے نکالا جائے گا۔

صہیونی فوج کی ریاستی دہشت گردی کے خلاف الناصرہ شہر میں بھی متعدد مقامات پر احتجاجی مظاہرے اور ریلیوں کا اہتمام کیا گیا ہے۔

بشکریہ:مرکزاطلاعات فلسطین