اسرائیلی وزیراعظم بنجمن نیتن یاھو نے فلسطینی مزاحمت کاروں بالخصوص صہیونی ریاست پرحملے کرنے والے فدائی حملہ آوروں کے خاندانوں سے نہایت ظالمانہ انداز میں نمٹنے کی دھمکی دی ہے۔
ان کا کہنا ہے کہ یہودیوںپرحملوں میںملوث عربوں کے لیے اسرائیل میں کوئی جگہ نہیں۔ انہوں نے سوموار کے روز یہودیوں پر فدائی حملے کرنےوالے فلسطینیوں کے مکانات فوری طور پر مسمارکرنے کے احکامات بھی جاری کیے۔
مرکزاطلاعات فلسطین کے مطابق اسرائیلی وزیراعظم نیتن یاھو کےدفتر سے جاری ایک بیان میں سیکیورٹی حکام اور پولیس کو سختی سے ہدایت کی گئی ہے کہ وہ یہودیوں پر حملوں میں ملوث فلسطینیوں سے سختی سے نمٹیں اور فدائی کارروائیاں روکنے کے لیے موثر اقدامات کریں۔
قبل ازیں اسرائیلی وزیراعظم نے ایک اعلیٰ سطح کے سیکیورٹی اجلاس کی صدارت کی۔ اجلاس میں وزیرداخلہ برائے داخلی سلامتی، وزیردفاع، آرمی چیف، داخلی سلامتی کے خفیہ ادارے، شاباک کے سربراہ، انسپکٹر جنرل پولیس اور مشیرقانون سمیت کئی دوسرے عہدیداروں نے شرکت کی۔ اجلاس میں فیصلہ کیا گیا کہ یہودیوں پر حملوں میں ملوث فلسطینی شہریوں کے مکانات مسمار کر کے انہیں وہاں سے بے دخل کر دیا جائے گا۔
خیال رہے کہ سوموار کے روز مقبوضہ فلسطین میں تین الگ الگ واقعات میں اسرائیلیوں پر قاتلانہ حملے کیے گئے تھے۔ چاقو کے وار سے زخمی ہونے والا ایک یہودی فوجی شیلونی اور ایک صہونی خاتون ہلاک اور متعدد افراد زخمی ہوئے ہیں۔
بشکریہ:مرکزاطلاعات فلسطین