غزہ سے اشکول یہودی کالونی پر راکٹ حملے کا اسرائیلی الزام

اسرائیلی فوج نے شبہ ظاہر کیا ہے کہ جمعہ کے روز فلسطینی کے علاقے غزہ کی پٹی سے اسرائیل کے اندر واقع اشکول یہودی کالونی پر راکٹ حملے کیے گئے تاہم اس دعوے کی آزاد ذرائع سے تصدیق نہیں ہوسکی ہے۔

اسرئیل کے عبرانی زبان میں نشریات پیش کرنے والے نیوز چینل ’’ٹی وی 10‘‘ کے نامہ نگار ’’الون بن ڈیوڈ‘‘ نے اپنی رپورٹ میں عسکری ذرائع کے حوالے سے اطلاع دی ہے کہ فوج نے اشکول کالونی میں راکٹ حملے کی وارننگ جاری کی تھی تاہم اب وہ اس بات کی چھان بین کررہے ہیں کہ آیا واقعی غزہ کی پٹی سے اشکول یہودی کالونی پر کوئی راکٹ داغا گیا تھا یا نہیں۔
بن ڈیوڈ کا کہنا ہے کہ ابھی تک خود اسرائیلی فوج بھی راکٹ حملے کے بارے میں شش وپنج میں مبتلا ہے اور یہ تصدیق نہیں کرسکی کہ آیا کوئی راکٹ حملہ ہوا ہے یا نہیں۔ البتہ اس حوالے سے تحقیقات کا عمل جاری ہے۔

مرکز اطلاعات فلسطین کے مطابق جمعہ کے روز اسرائیلی الیکٹرانک میڈیا نے افواہ پھیلائی تھی کہ مشرقی غزہ کی پٹی میں اسرائیل کے اندر آنے والی اشکول یہودی کالونی پر غزہ سے راکٹ داغے گئے ہیں۔

اسرائیل کی عبرانی ٹی وی 2 کے مطابق جنوبی غزہ سے ایک راکٹ اشکول کالونی پر داغا گیا تھا جو ایک کھلے مقام پر جا گرا اور اس کے نتیجے میں کسی قسم کا کوئی نقصان نہیں ہوا ہے۔