مرکز اطلاعات فلسطین کے مطابق سوشل میڈیا اور بعض اخبارات نے بھی خبریں پھیلائی تھیں کہ غزہ کے سابقہ ملازمین کو آج منگل کو تنخواہیں جاری کی جائیں گی اہم فلسطینی سیکرٹری خزانہ یوسف الکیالی نے ملازمین کی امیدوں پر یہ کہہ کر پانی پھیر دیا کہ فی الحال تنخواہیں جاری کرنے کا کوئی انتظام نہیں ہو سکا ہے۔ البتہ اس سلسلے میں حکومت عالمی برادری کی جانب سے امداد کے وعدوں کے انتظار میں ہے۔
ایک بیان میں یوسف الکیالی کا کہنا تھا کہ میڈیا میں آنے والی خبریں بے بنیاد ہیں اور ان خبروں کی بنیاد پر کوئی شخص جلد تنخواہوں کی امید نہ لگائے۔
خیال رہے کہ غزہ کی پٹی میں اسماعیل ھنیہ کی سربراہی میں قائم رہنے والی سابقہ حکومت کے ملازمین کو تنخواہوں کی ادائیگی اس وقت روک دی گئی تھی جب فلسطین میں صدر محمود عباس کی جماعت الفتح کے اشتراک سے گذشتہ اپریل میں قومی حکومت تشکیل دی گئی تھی۔ گوکہ حکومت کی جانب سے سابقہ ملازمین کو تنخواہوں کی ادائی کی یقین دہانی کرائی گئی ہے تاہم فلسطینی اتھارٹی کی جانب سے اس مد میں فنڈز جاری نہیں کی گئے ہیں۔
بشکریہ:مرکزاطلاعات فلسطین