اسرائیل کے ذرائع ابلاغ نے انکشاف کیا ہے کہ حال ہی میں فلسطین کے علاقے غزہ کی پٹی پر مسلط کی گئی اسرائیلی فوج کی جنگ کو کامیابی سے ہم کنار کرنے کے لیے اسرائیلی خفیہ اداروں نے بھی اپنی تمام مکروہ چالیں بھرپور طریقے سے استعمال کیں۔
میڈیا رپورٹس کے مطابق صہیونی خفیہ ادارے غزہ کی پٹی میں موجود اپنے جاسوسوں کی مدد سے فلسطینی مزاحمتی گروپوں میں پھوٹ پیدا کرنا اور انہیں آپس میں دست و گریباں کرنے کی سازشیں کرتے رہے ہیں تاہم فلسطینی مزاحمت کاروں نے ان سازشوں کو کامیاب نہیں ہونے دیا ہے۔
اسرائیلی فوج کے مقرب سمجھے جانے والے نیوز ویب پورٹل "المجد” کی جانب سے جاری ایک رپورٹ میں ذرائع کے حوالے سے جاسوسوں کو ہدایات سے متعلق اہم معلومات افشاء کی گئی ہیں۔ ذرائع کا کہنا ہے کہ فلسطینی مزاحمتی گروپوں کو آپس میں لڑانے کے لیے اسرائیلی خفیہ اداروں نے اپنے جاسوسوں اور ایجنٹوں کو خوب استعمال کیا۔ یہ ایجنٹ جنگ کے دوران گروہی تعصبات پر مبنی اور فرقہ وارانہ نوعیت کے نعرے لگاتے رہے ہیں۔ تاکہ فلسطینی مزاحمتی گروپوں میں ایک دوسرے کے حوالے سے شکوک و شبہات پیدا کرکے انہیں اسرائیل کے خلاف جنگ میں شکست سے دوچار کیا جاسکے۔
ذرائع کے مطابق غزہ کی پٹی میں پکڑے گئے کئی جاسوسوں نے اپنے اس طریقہ واردات کا اعتراف کیا اور کہا کہ وہ اسرائیلی خفیہ اداروں کی ہدایت کے تحت فرقہ وارانہ نعرے لگاتے اور مزاحمتی گروپوں کو ایک دوسرے کے دست و گریباں کرنے کی کوشش کرتے رہے ہیں۔
بشکریہ:مرکزاطلاعات فلسطین