امریکا اپنے شہریوں کو اسرائیل آنے کی اجازت دے: لائبرمین

اسرائیلی وزیرخارجہ آوی گیڈور لائبرمین نے امریکی حکومت پر زور دیا ہے کہ وہ اپنے شہریوں کو اسرائیل میں آنے سے نہ روکیں اور امریکی وزیرخارجہ جان کیری نے غزہ جنگ کے دوران اپنے شہریوں کو اسرائیل کے سفر سے گریز کی ہدایت کی تھی وہ واپس لی جائے کیونکہ اب حالات معمول پر آنا شروع ہوگئے ہیں۔

مرکز اطلاعات فلسطین کے مطابق اسرائیلی وزارت خارجہ کی جانب سے جاری ایک بیان میں کہا گیا ہے کہ لائبرمین نے اپنے امریکی ہم منصب سے رابطہ کیا ہے اور ان سے کہا ہے کہ وہ اپنے شہریوں کو اسرائیل کے سفر سے نہ روکیں۔ غزہ جنگ کے بعد اب حالات معمول پر آگئے ہیں۔ اس لیے امریکی اور دوسرے ملکوں کے شہریوں کو اسرائیل کے سفر سے گریز نہیں کرنا چاہیے۔

بیان میں کہا ہے کہ لائبرمین نے گذشتہ بدھ کو واشنگٹن میں جان کیری سے ملاقات کی تھی اور ان سے کہا تھا کہ وہ اپنے شہریوں کو اسرائیل کے سفر سے اجتناب کی وارننگ واپس لیں۔

خیال رہے کہ غزہ کی پٹی پر 08 جولائی سے 26 اگست تک 51 روزہ صہیونی جارحیت کے دوران لائبرمین اور امریکی وزیرخارجہ جان کیری مسلسل ایک دوسرے سے رابطے میں رہے ہیں۔ لائبرمین نے اپنے ایک بیان میں کہا تھا کہ اسرائیلی عوام اور حکومت بہ خوبی جانتے ہیں کہ امریکا سے بڑھ کر ہمارا کوئی وفادار دوست اور مشکل کا ساتھی نہیں ہوسکتا۔