فلسطین نائب وزیراعظم زیاد ابو عمر نے کہا ہے کہ جنگ سے تباہ حال غزہ کی پٹی کی تعمیرنو کے لیے بین الاقوامی ڈونرز کانفرنس پیش آئندہ ماہ اکتوبر کی 10 تاریخ کو مصر کے صدر مقام قاہرہ میں منعقد ہو گی جس میں عالم اسلام اور دوسرے ممالک سے مندوبین شرکت کریں گے۔
مرکز اطلاعات فلسطین کے مطابق ایک انٹرویو میں فلسطینی نائب وزیراعظم نے کہا کہ غزہ کی تعمیر نو اور بحالی کے کاموں میں اسرائیل کی جانب سے رکاوٹیں کھڑی کی جا رہی ہیں۔ ان رکاوٹوں کو دور کرنے کے لیے فلسطینی قیادت کے عالمی رہ نماؤں سے بھی رابطے ہیں۔ ہم عالمی برادری کے ذریعے اسرائیل پر غزہ کی پٹی میں تعمیراتی سامان کی منتقلی کے لیے دباؤ ڈال رہے ہیں۔
ایک سوال کے جواب میں زیاد ابو عمرو کا کہنا تھا کہ اسرائیل غزہ کی تعمیر نو میں امداد فراہم کرنے کے لیے مجوزہ ڈونرز کانفرنس کے انعقاد میں بھی روڑے اٹکانے کی سازشیں کر رہا ہے لیکن صہیونی حکومت کی کسی سازش کو کامیاب نہیں ہونے دیا جائے گا۔
انہوں نے کہا کہ اس وقت تمام ممالک اور فلسطینی تنظیموں کی توجہ غزہ کی پٹی میں ہنگامی بنیادوں پر تعمیر نو اور بحالی کے منصوبوں پر مرکوز ہے۔ فلسطینی حکومت غزہ کے شہریوں کی مشکلات کم کرنے کے لیے دن رات کام کر رہی ہے۔
ایک دوسرے سوال کے جواب میں فلسطینی عہدیدار نے بتایا کہ فلسطینی حکومت ڈونرز کانفرنس میں شرکت کی بھرپور تیاری کر رہی ہے۔ اس سلسلے میں غزہ کی پٹی میں اسرائیل کی حالیہ جنگ کے نتیجے میں ہونے والی تباہی اور تعمیرنو سے متعلق ایک رپورٹ مرتب کی جا رہی ہے۔
ڈونرز کانفرنس میں یہ رپورٹ پیش کی جائے گی اور اس کی روشنی میں عالمی برادری سے امداد کی اپیل کی جائے گی۔ انہوں نے عالمی برادری سے ڈونرز کانفرنس کو کامیاب بنانے کے لیے بڑھ چڑھ کر امداد فراہم کرنے کا بھی مطالبہ کیا۔