اسرائیلی جیل میں قید فلسطین قومی اسمبلی کے رکن احمد عطون کو گذشتہ روز مغربی رام اللہ میں قائم "عوفر” جیل سے رہا کردیا گیا جس کے بعد وہ آبائی شہر بیت المقدس پہنچ گئے ہیں۔ احمد عطون کو ڈیڑھ سال قبل حراست میں لیا گیا تھا۔
سنہ 2006ء میں فلسطین میں ہونے والے پارلیمانی انتخابات کے بعد احمد عطون کو اب تک کم سے کم چار مرتبہ حراست میں لیا جا چکا ہے۔ وہ سنہ 2006ء کے انتخابات کے دوران بیت المقدس سے اسلامی تحریک مزاحمت "حماس” کی ٹکٹ پر کامیاب ہوئے تھے۔ ان کا ایک بیٹا بھی اسرائیلی جیل میں قید ہے۔ اس پر فلسطینی مزاحمت کاروں کی حمایت اور مدد کا الزام عائد کیا گیا ہے۔
تین سال پیشتر اسرائیل کی ایک عدالت نے بیت المقدس سے تعلق رکھنے والے فلسطینی ارکان اسمبلی احمد عطون، خالد ابو عرفہ اور محمد ابو طیر کو شہر بدر کرنے کا حکم دیا تھا۔ تاہم انہوں نے صہیونی عدالت کا فیصلہ ماننے سے انکار کردیا تھا۔ جس کے بعد انہیں حراست میں لے لیا گیا تھا۔