اسرائیلی سیکیورٹی ذرائع کے مطابق جمعہ 08 اگست کو جنگ بندی کی مدت ختم ہوتے ہی غزہ کی پٹی سے اسرائیلی تنصیبات پر کم سے کم 40 راکٹ داغے گئے۔ خیال رہے کہ 3 روز قبل مصرکی ثالثی کے تحت فلسطینی مزاحمتی تنظیموں اور اسرائیل کے درمیان عارضی جنگ بندی پر اتفاق کیا گیا جس کے بعد غزہ سے راکٹ حملے روک دیے گئے تھے۔
اسرائیلی ریڈیو کی رپورٹ کے مطابق جمعہ کے روز غزہ سے یہودی کالونیوں پر پھینکے گئے راکٹ حملوں میں کم سے کم دو یہودی آباد کار زخمی ہوئے ہیں۔ اسرائیلی اسپتال ذرائع کے مطابق زخمیوں میں سے ایک کی حالت تشویشناک ہے جبکہ دوسرے کو معمولی زخم آئے ہیں۔ دونوں زخمیوں کو بیئر سبع کے سوروکا اسپتال منتقل کیا گیا ہے۔
اسرائیلی فوج کے ایک ذریعے کا کہنا ہے کہ اسرائیل نے اسلامی تحریک مزاحمت "حماس” کو یہ پیغام دیا تھا کہ اگر غزہ سے دوبارہ راکٹ داغے گئے تو فوج اس کا سخت جواب دے گی، حماس نے اسرائیل کا پیغام نہیں سمجھا اور راکٹ حملے دوبارہ شروع کر دیے ہیں جس کے بعد فوج بھرپور جوابی کارروائی کی تیاری کر رہی ہے۔
خیال رہے کہ آج جمعہ کو اسرائیلی فوج کی غزہ کے مختلف علاقوں پر فضائی اور زمینی حملوں میں ایک 10 سالہ بچہ شہید اور کم سے کم 15 شہری زخمی ہوئے ہیں۔