فلسطینی شہر غزہ کی پٹی پر اسرائیلی فوج کی وحشیانہ بمباری اور بربریت کی بدترین مثالیں دیکھی جا رہی ہیں۔ گذشتہ شب درندہ صفت صہیونی فوج نے جنوبی غزہ کے شہر خان یونس میں بنی سہلا کے مقام پر ابو جامع نامی ایک شہری کےگھر پر میزائل حملے کیے جن کے نتیجے میں ان کے خاندان کے 28 افراد شہید ہو گئے۔ زیادہ شہادتیں مکینوں کے مکان کے ملبے تلے دب جانے سے ہوئیں۔ امدادی کارکنوں نے کئی گھنٹے کی مسلسل کوشش کے بعد تمام شہداء کی میتیں نکال لی ہیں۔
مرکز اطلاعات فلسطین کے مطابق صہیونی فوج نے ابو جامع کے مکان پر بہ یک وقت زمینی اور فضائی حملے کیے جس کے نتیجے میں بچوں اور خواتین سمیت کم سے کم اٹھائیس معصوم شہری شہید ہو گئے۔
غزہ کی پٹی پر 08 جولائی سے جاری صہیونی فوج کی سفاکیت میں اب تک کئی خاندانوں کو نیست و نابود کیا جا چکا ہے لیکن بنی سہلا کا واقعہ صہیونی بربریت کی بدترین مثال ہے، جس میں اتنی بڑی تعداد میں ایک ہی خاندان کے افراد کو نہایت بے رحمی کے ساتھ شہید کیا گیا ہے۔
خیال رہے کہ آٹھ جولائی سے جارہ صہیونی فوجی بدترین دہشت گردی میں اب تک کم سے کم 510 شہری شہید اور ساڑھے تین ہزار سے زائد زخمی ہو چکے ہیں۔ شہداء میں بڑی تعداد خواتین اور بچوں کی بھی بیان کی جاتی ہے۔