فلسطینی شہر غزہ کی پٹی پر اسرائیلی فوج کی وحشیانہ کارروائی اور نہتے شہریوں کو تباہ کن میزائل حملوں سے نشانہ بنائے جانے پر ملک بھر میں احتجاج کی ایک نئی لہر اٹھ کھڑی ہوئی ہے۔ کل جمعہ کو مقبوضہ مغربی کنارے سمیت مختلف شہروں میں اسرائیلی جارحیت کے خلاف احتجاجی جلوس اور ریلیاں نکالی گئیں۔
مرکز اطلاعات فلسطین کے مطابق سب سے بڑا جلوس مقبوضہ الخلیل میں نکالا گیا جس میں ہزاروں افراد نے شرکت کی۔ شہداء نے ہاتھوں میں سبز، سرخ اور سیاہ پرچم، کتبے اور بینرز اٹھا رکھے تھے جن پر اسرائیلی جارحیت کے خلاف نعرے درج تھے۔
مرکز اطلاعات فلسطین کے مطابق گزشتہ روز نماز ترویح کے بعد بھی الخلیل میں جامع مسجد الحسین سے ایک بڑی ریلی نکالی گئی۔ مظاہرین اسرائیل کے خلاف شدید نعرے بازی کرتے ہوئے شہر کے مرکزی گراؤنڈ کی طرف بڑھ رہے تھے کہ اس دوران اسرائیلی فوجیوں نے انہیں گھیرے میں لے کر تشدد کا نشانہ بنانا شروع کر دیا۔ مظاہرین اسرائیل مردہ باد اور القسام، مجادین اور حماس زندہ باد کے نعرے لگانے لگے۔ اس پر اسرائیلی فوج نے ان پر لاٹھی چارج کیا اور ان پر گولیاں چلائیں جس کے نتیجے میں متعدد افراد زخمی ہو گئے۔ جوابی کارروائی میں مظاہرین نے فوجیوں اور صہیونی پولیس پر سنگ باری کی۔ شہریوں نے ٹائر جلا کر سڑکیں بلاک کر دیں
اطلاعات کے مطابق فلسطین کے دیگر شہروں رام اللہ، نابلس اور بیت المقدس میں بھی اسرائیلی جارحیت کے خلاف جلسے جلوس اور ریلیاں نکالی گئیں اور غزہ کے مظلوم عوام کے ساتھ مکمل یکجہتی کا اظہار کیا گیا۔ بیت المقدس میں نکالی گئی ایک ریلی اور اسرائیلی فوج کے درمیان جھڑپ ہوئی، جس کے نتیجے میں متعدد فلسطینی زخمی ہو گئے۔