فلسطین کے مقبوضہ مغربی کنارے میں اسلامی تحریک مزاحمت "حماس” اور اس کی ذیلی تنظیموں پر عائد پابندیوں کے باوجود جماعت کی طلباء تنظیم "اسلامک بلاک” نے الخلیل شہر میں پولی ٹیکنیک یونیورسٹی کی 31 میں سے 14 نشستوں پر کامیابی حاصل کرلی ہے۔
مرکز اطلاعات فلسطین کے مطابق جامعہ کی ترجمان اور طلباء امور کے نگران عمادہ نے میڈیا کو بتایا کہ نیشنل طلباء کونسل برائے 2015 – 2014 کے لیے یونیورسٹی میں انتخابات کرائے گئے، جن میں اسلامی تحریک مزاحمت حماس کے حمایت یافتہ اسلامک بلاک 14 ، طلباء یوتھ فورس 17 نشستیں جتینے میں کامیاب رہے ہیں جبکہ بیداری طلباء محاذ، دائیں بازو کے قوم پرست طلباء گروپ اور کوئی آزاد امیدوار کامیاب نہیں ہوسکے ہیں۔
ترجمان نے کہا کہ طلباء کی ووٹ ڈالنے کی شرح 60 فی صد رہی اور مجموعی طور پر 5000 طلباء وطالبات نے طلباء کونسل کے انتخابات میں اپنا حق رائے دہی استعمال کیا۔
مرکز اطلاعات فلسطین کے نامہ نگار کے مطابق حماس کے حمایت یافتہ طلباء گروپ کی ایک ایسے وقت میں کامیابی ممکن ہوئی ہے جب بلاک کے چوبیس سرکردہ رہ نما زیرحراست ہیں اور سیکڑوں کو ووٹ ڈالنے سے روکا گیا ہے۔ اس کے باوجود نتائج گذشتہ برس سے بہتر آئے ہیں۔ پچھلے سال اسلامک بلاک نے پولی ٹیکنیک یونیورسٹی میں 13 نشستیں حاصل کی تھیں۔
بشکریہ:مرکزاطلاعات فلسطین