فلسطین کے مقبوضہ فلسطین کے شہر "عکا” میں عام شاہراؤں کے ساتھ بنی دیواروں اور پبلک مقامات پر عبرانی زبان میں "عرب مردہ باد” جیسے اشتعال انگیز نعروں کی چاکنگ کی گئی ہے، جس کے بعد فلسطینی شہریوں میں سخت غم وغصے کی فضاء پائی جا رہی ہے۔
اسرائیلی ریڈیو کی رپورٹ کے مطابق سنہ 1948 ء کے مقبوضہ فلسطینی شہر "عکا” کے ایک ہائی اسکول کی چار دیواری کے باہر عربوں، مسلمانوں اور فلسطینیوں کے خلاف نفرت آمیز نعرے تحریر کیے گئے ہیں۔
ریڈیو رپورٹ کے مطابق پولیس نے اشتعال انگیز چاکنگ کرنے والوں کی تلاش شروع کردی ہے تاہم آخری اطلاعات تک کسی شخص کی گرفتاری کی تصدیق نہیں ہوسکی۔
ادھر فلسطینی ذرائع نے اطلاع دی ہے کہ مغربی کنارے کے شہر الخلیل میں انتہا پسند یہودیوں نے فلسطینی شہری کے ایک مکان پر حملہ کرکے اس کی کھڑکیوں کے شیشے توڑ دیے ہیں۔ ذرائع کا کہنا ہے کہ یہودی آباد کاری میں ملوث بعض گروپ فلسطینیوں کو مکان خالی کرانے کے لیے اس نوعیت کے حملے آئے روز کرتے رہتے ہیں۔
بشکریہ:مرکزاطلاعات فلسطین