قابض اسرائیلی فوج نے جنوبی الخلیل میں یطہ قصبے کے نزدیک اپنے بلڈوزروں کو تباہی مچانے کے لئے کھلا چھوڑ دیا جس کے نتیجے میں زیتون اور بادام کے دس دونم رقبے کے باغ تباہ ہوگئے۔
سماجی کارکن راتب الجبور نے مرکز اطلاعات فلسطین کو بتایا ہے کہ اسرائیلی فوجیوں کی ایک بڑی تعداد نے بلڈوزروں کی اس کارروائی کے دوران انہیں اپنے حفاظتی حصار میں لئے رکھا۔ان کا کہنا تھا کہ فوجیوں نے یہ دعویٰ کیا کہ یہ علاقہ ملٹری زون میں تھا اور اوسلو معاہدے کے تحت بنائے گئے علاقہ سی میں آتا ہے جو کہ اسرائیل کے سپرد کیا گیا تھا۔
راتب الجبور کے مطابق یطہ میں املاک کی تباہی اور زمین پر اسرائیلی قبضے کا مقصد یہاں کے رہائشیوں کو ڈرا دھمکا کر بھگانا ہے تاکہ اس علاقے میں بھی یہودی آبادکاری کی جاسکے۔