اسرائیلی فوج نے شمالی فلسطین کے سنہ 1948ء کے دوران قبضے میں لیے گئے علاقے "خلیج حیفا” میں درمیانے فاصلے تک مار کرنے والے میزائلوں کی روک تھام کے لیے میزائل شکن نظام آئرن ڈوم کی بیٹریاں نصب کرنے کا اعلان کیا ہے۔
اسرائیلی ٹیلی ویژن چینل کی رپورٹ کے مطابق فوج نے ایک روز قبل خلیج حیفا میں مختلف مقامات پر آئرن ڈوم کی کچھ بیٹریاں نصب کی ہیں۔ اسی علاقے میں مزید آئرن ڈوم کی بیٹریاں بھی نصب کی جائیں گی۔رپورٹ کے مطابق تین ہفتے قبل جنوبی لبنان کی جانب سے اسرائیل پر”کاتیوشا” راکٹوں سے حملہ کیا گیا جس کے بعد فوج نے دفاعی نقطہ نظرکے تحت یہاں پر آئرن ڈوم سسٹم نصب کرنے کا فیصلہ کیا ہے۔
خیال رہے کہ لبنان کی جنوبی اور اسرائیل کی شمالی سرحدیں گذشتہ کئی ماہ سے کشیدگی کا مرکز بنی ہوئی ہیں۔ سرحد پر دونوں ملکوں کی فورسز کی جانب سے ایک دوسرے پر حملوں کی مسلسل خبریں آتی رہتی ہیں۔ اسرائیل نے الزام عائد کیا ہے کہ لبنانی شیعہ ملیشیا حزب اللہ اسرائیلی فوج پر حملوں میں ملوث ہے۔