فلسطینی اتھارٹی کے زیرکمانڈ سیکیورٹی فورسز کے ترجمان نے آزادی کے لیے اسرائیل کے خلاف فلسطینیوں کی مسلح جدوجہد کو "غنڈہ گردی اور بدمعاشی” قرار دیا ہے۔
مرکز اطلاعات فلسطین کے مطابق فلسطینی اتھارٹی کے عہدیدار فیصل الضمیری نے بدھ کے روز صحافیوں کے ایک وفد سے گفتگو کرتے ہوئے کہا کہ طاقت اور غنڈہ گردی کا استعمال اسرائیل کی جانب سے فلسطینیوں کے خلاف کیا جاتا رہا ہے، لیکن فلسطینیوں کی جانب سے پرامن جدوجہد ہی زیادہ مناسب ہے۔ انہوں نے کہا کہ فلسطینی عوام صرف پرامن تحریک کے ذریعے عالمی برادری کی ہمدرریاں حاصل کرکے اپنے حقوق کے حصول میں کامیاب ہوسکتے ہیں۔
ان کا کہنا تھا کہ طاقت اور اسلحے کے زور پر مطالبات منوانے کے لیے عالمی برادری بھی ہمارا ساتھ نہیں دے گی۔ خیال رہے کہ فیصل الضمیری کی جانب سے فلسطینی تحریک مزاحمت کےخلاف یہ بیان آتش بیانی نہیں بلکہ وہ فلسطینی مزاحمت کاروں کےخلاف کارروائیوں میں اسرائیلی فوج کے ساتھ کھل کر تعاون کے حامی سمجھے جاتے ہیں۔
بشکریہ:مرکزاطلاعات فلسطین