قابض صہیونی فوج نے غزہ کی پٹی میں ساحل سمندر میں فلسطینی ماہی گیروں پر فائرنگ کی ہے جس کے نتیجے میں متعدد کشتیاں تباہ ہوگئی ہیں تاہم کسی قسم کے جانی نقصان کی اطلاع نہیں ملی ہے۔
غزہ کے سیکیورٹی ذرائع نے بتایا کہ صہیونی بحریہ کی آبدوزوں نے شمالی غزہ میں ماہی گیروں کی کشتیوں پر کئی گولے داغے اور ان پرمشین گن سے فائرنگ کی گئی، جس کے نتیجے میں متعدد کشتیوں کو نقصان پہنچا ہے۔
خیال رہے کہ اسرائیل کی جانب سے غزہ کی پٹی کے محصور شہریوں کو سمندر میں ماہی گیری سے بھی روکا جا رہا ہے۔ گذشتہ برس فلسطینی تنظیموں اور صہیونی حکومت کے درمیان طے فائر بندی معاہدے میں سمندر میں پچاس کلو میٹر تک فلسطینی ماہی گیروں کو نشانہ نہ بنانے کا فیصلہ کیا گیا تھا لیکن عملا صہیونی فوج غزہ کے ماہی گیروں کو پانچ سے چھ کلو میٹر سے آگے نہیں جانے دیتے۔
گذشتہ برس صہیونی فوج کی فائرنگ سے کئی ماہی گیر شہید اور دسیوں زخمی ہوئے تھے، رواں سال ماہی گیروں پر قابض فوج کا یہ پہلا حملہ ہے۔
بشکریہ:مرکزاطلاعات فلسطین