فلسطین شہرغزہ کی پٹی میں قائم اسلامی تحریک مزاحمت [حماس] کی حکومت کے وزیر برائے مذہبی امور ڈاکٹر اسماعیل رضوان نے کہا ہے کہ صہیونی دشمن کی جانب سے مساجد اور عبادت گاہوں کی مسماری سے ان مقامات کے کردار کو ختم نہیں کیا جا سکتا ہے۔ ان کا کہنا ہے کہ صہیونی ریاست نے 2010 ء اور 2012 ء کے دوران غز کی پٹی پر وحشیانہ بمباری کے دوران مساجد اور عبادت گاہوں کو خاص طور پر نشانہ بنایا جس کے نتیجے میں سیکڑوں مساجد شہید ہوگئیں لیکن ان مقدس مقامات کے کردار کوختم نہیں کیا جاسکا ہے۔ انہوں نے کہا کہ مساجد شہریوں کی تعلیم وتربیت کے مراکزہیں اور یہ آئندہ بھی تربیتی مراکز رہیں گے۔ صہیونی ریاست چاہے جتنا زور لگا لے مساجد اور ان کے کردار کو ختم نہیں کرسکتا۔
ڈاکٹر اسماعیل رضوان کا کہنا تھا کہ غزہ حکومت نے سال 2013 ء کے دوران شمالی غزہ میں 41 مساجد کا سنگ بنیاد رکھا ہے۔ ان میں 12 مساجد کی تعمیرو مرمت کا کام صرف ایک ماہ میں شروع کیا گیا۔
مرکزاطلاعات فلسطین کے مطابق فلسطینی وزیر نے ان خیالات کا اظہار غزہ کی پٹی کے شمالی ضلع میں جامع مسجد بنی صالح کی افتتاحی تقریب سے خطاب میں کیا۔ تقریب میں سیکرٹری مذہبی امور ڈاکٹر ولید عویضہ، ڈائریکٹر اوقاف الشیخ عبدالقادرسالم ،جبالیا یونین کونسل کے چیئرمین عصام عودہ تعمیر مساجد کمیٹی کے چیئرمین ڈاکٹر ماھر السوسی سمیت کئی دیگر اہم شخصیات موجود تھیں۔
اس موقع پر فلسطینی وزیرنے بتایا کہ سنہ 2010 ء میں معرکہ فرقان کے دوران صہیونی فوج نے 30 مساجد کلی طورپر شہید کردی تھیں اور 137 کو جزوی نقصان پہنچایا گیا تھا۔