اسرائیلی حکام اور فوج نے مشترکہہ آپریشن میں مغربی کنارے کے شمالی شہر نابلس کے جنوب میں قصرہ کے مقام پر فلسطینیوں کے دس ایکڑ زرعی رقبے پر قبضہ کرنے کا فیصلہ کیا ہے اور ساتھ اس علاقے کے آس پاس فلسطینی شہریوں کو پانچ سو ایکڑ رقبے میں داخلے سے بھی روک دیا گیا ہے۔
مقامی سماجی رہ نما اور یہودی آباد کاری پر نظر رکھنے والے کارکن غسان دغلس نے بتایا کہ منگل کو صہیونی حکومت نے نابلس میں فلسطینیوں کی دس ایکڑ زرعی اراضی پر قبضے کا حکم جاری کیا ہے۔ دس ایکڑ اراضی سے ملحقہ کم سے کم پانچ سو ایکڑ کے رقبے پر فلسطینیوں کو داخلے اور کسی قسم کی کھیتی باڑی سے روک دیا ہے۔
غسان دغلس کا کہنا ہے کہ صہیونی حکام کی جانب سے فلسطینیوں کی اراضی ہتھیانے کی یہ پہلی کارروائی نہیں ہے بلکہ علاقے میں "یائچ کودچ” نامی یہوی کالونی فلسطینیوں کی اراضی فوجی طاقت کے ذریعے ہتھیانے کے بعد بنائی گئی ہے۔ تازہ کارروائی اور فلسطینیوں کی اراضی پرقبضے کا مقصد بھی یہ معلوم ہو رہا ہے کہ صہیونی فوج اور حکومت قصرہ کی اراضی کو اسی کالونی میں ضم کرنا چاہتی ہے۔