فلسطین کے مقبوضہ مغربی کنارے کے جنوبی شہرجنین میں یعبد قصبے میں ایک فلسطینی شہری کے مکان پراسرائیلی فوج نے قبضہ کرکے اسے فوجی چوکی میں تبدیل کردیا ہے اور گھرمیں موجود خواتین اور بچوں سمیت بارہ افراد کو یرغمال بنا لیا ہے۔ادھر یعبد میں کارروائی کے دوران بلدیہ کے چیئرمین اور متعدد صحافیوں کو حراست میں لے لیا گیا ہے۔
مقامی فلسطینی ذرائع کے مطابق یعبد میں اسرائیلی فوج نے جس مکان پرقبضہ کیا ہے اس مکان میں رہائش پذیر 12 افراد کو صہیونی فوج نے مکان کے ایک حصے میں محصور کردیا ہے۔ ان کی مدد کے لیے کل اتوار کے روز یعبد بلدیہ کے میئر سامر ابو بکر اور ان کے ہمراہ کچھ صحافی بھی محصورین کو خوراک فراہم کرنے گئے توصہیونی فوج نے انہیں بھی حراست میں لے لیا۔
عینی شاہدین کا کہنا ہے کہ مکان میں موجود محصور خواتین اور بچوں نے باہر نکلنے کی متعدد مرتبہ کوشش کی ہے لیکن صہیونی فوج نے انہیں دھمکی دی ہےکہ وہ باہر نکلنے کوشش کریں گے تو انہیں گولی مار کرقتل کردیا جائے گا۔ بعد میں ان کی مدد کو آنے والے صحافیوں کو بھی دو گھنٹے تک حراست میں رکھا گیا۔ گھرکے مالک عاطف ابو بکر اور ان کے بیوی بچے گذشتہ تین روز سے گھر میں نظربند ہیں۔ انہیں پانی اور بنیادی ضرورت کی خوراک تک میسر نہیں ہے۔