عبرانی میڈیا ذرائع کے مطابق یروشلم کی پلاننگ اور بلڈنگ کمیٹی نے جنوبی یروشلم کے گائوں ولجہ کی زمین پر یہودی آبادکاروں کے لئے ایک نئے پارک کی تعمیر کی منظوری دے دی ہے۔
ہارتس اخبار کے مطابق پارک کی حدود نسلی تعصب کی مظہر دیوار کے ساتھ ساتھ چلے گی، یہ دیوار ولجہ گائوں کے دیہاتیوں کو ان کے کھیتوں سے علیحدہ رکھنے کا کام بھی انجام دیتی ہے۔
یروشلم کے جنوبی کونے میں واقع رفائیم ویلی پارک 5700 دونم یا 1425 ایکڑ زمین پر محیط ہوگا اور اس بڑے شہری پارک کا حصہ ہوگا جو کہ یروشلم کو تین اطراف سے گھیرے ہوئے ہے۔ اخبار نے مزید بتایا کہ رفائیم ویلی کے درمیان سے گزرنے والی ہری لائن ہی وہ جگہ ہے جہاں پر پارک موجود ہوگا۔
ہارتس نے کہا کہ اس پارک کی 1200 دونم زمین سیڑھیدارکھیت ہیں جو کہ ولجہ کے دیہاتیوں کی ملکیت ہیں۔ دیہاتیوں کا کہنا ہے کہ سیڑھیدار زراعت کی قدیم ثقافت کو سب سے بڑا خطرہ اس نسلی تعصب کی مظہر دیوار سے ہے جو کہ ابھی زیر تعمیر ہے۔
ایک اسرائیلی عہدیدار کا کہنا ہے کہ،”اس علاقے کی شکل و صورت کو فلسطینی کھیتوں سے ایک اسرائیلی تفریحی علاقے میں بدلنے کا عمل مقدس شہر اور قریبی یہودی بستیوں کے درمیان ربط قائم کرنے کے منصوبے میں باآسانی سما جاتا ہے۔”
بشکریہ:مرکزاطلاعاتفلسطین