اسرائیلی حکام نے مغربی کنارے کے شمالی شہر سلفیت کے فلسطینی شہریوں کو بڑے پیمانے پر علاقہ خالی کرنے کے نوٹس جاری کردیے ہیں۔ جس علاقے کی بابت یہ احکامات صادر کیے گئے اس کی مسافت 100 ایکڑ بنتی ہے۔
شمالی مغربی کنارے میں یہودی آباد کاری کے امور کے عہدیدار غسان ڈگلس نے بتایا کہ اسرائیلی حکام نے سلفیت کے مغربی گاؤں بروقین کی 100 ایکڑ اراضی پر قبضہ کرنے کے لیے فلسطینیوں کو حالیہ نوٹس جاری کیا۔
انہوں نے کہا کہ یہ زرعی اراضی اس وقت فلسطینیوں کے زیر استعمال ہے، فلسطینیوں کے علاقہ چھوڑ دینے سے یہ ساری اراضی اسرائیل کے قبضے میں آجائے گی۔
واضح رہے کہ اسرائیل نے 1967ء میں مغربی کنارے اور مشرقی القدس پر اپنا تسلط قائم کیا تھا۔ اس وقت سے لیکر اب تک اسرائیلی مغربی کنارے میں 150 سے زائد یہودی بستیاں قائم کر چکا ہے جن میں ساڑھے پانچ لاکھ یہودیوں کو بسا دیا گیا ہے۔ مغربی کنارے پر قبضے کے دن سے لیکر اب تک فلسطینی اراضی کو ہتھیانے کا یہ سلسلہ جاری ہے۔
بشکریہ:مرکز اطلاعات فلسطین