اسلامی تحریک مزاحمت ۔ حماس کے سیاسی شعبے کے سرکردہ رہنما ڈاکٹر محمود الزھار کا کہنا ہے کہ علماء کے عالمی اتحاد کے سربراہ کا پچاس دینی شخصیات کے ہمراہ غزہ کا دورہ تمام اندازوں سے بڑھ کر کامیاب رہا ہے۔ اس دورے کو غزہ کے تمام شعبہ زندگی کی جانب سے سراہا گیا ہے جس کی دلیل ان کا غزہ میں نماز جمعہ کا خطبہ بھی ہے۔
سماجی روابط کی ویب سائٹ ’’فیس بک‘‘ پر اپنے بیان میں محمود الزھار نے کہا کہ شیخ یوسف قرضاوی کے پاس دو پاسپورٹ تھے ایک مصری اور ایک قطری۔ وہ عالم اسلام کی عظیم شخصیت ہیں اور ان کی ذات غزہ آمد کے لئے ویزے کے حصول سے بالا تر ہے۔ اس لیے ویزے کے بغیر ان کی غزہ آمد میں کوئی مضائقہ نہیں۔
غزہ حکومت کے وزیر اعظم اسماعیل ھنیہ نے عالم اسلام کے عظیم مذہبی اسکالر شیخ یوسف قرضاوی کو فلسطینی شہریت اور فلسطینی پاسپورٹ جاری کیا تھا، یہ اقدام انہوں نے شیخ قرضاوی کی جانب سے فلسطینی قوم اور مزاحمت کی حمایت پر انہیں خراج تحسین پیش کرتے ہوئے اٹھایا تھا۔
اسماعیل ھنیہ کے اس اقدام پر مغربی کنارے میں تحریک ‘فتح’ کی زیر نگین فلسطینی اتھارٹی نے بہت زیادہ واویلا کیا، تاہم حماس کی قیادت نے اتھارٹی کے رہنماؤں کی تنقید کو فلسطینی قوم کو مزید تقسیم کرنے کی بنیاد قرار دیا ہے۔
بشکریہ:مرکز اطلاعات فلسطین