قابض اسرائیلی فوج کی جانب سے مسجد اقصی آنے والے نمازیوں کو زدوکوب کرنے پر قبلہ اول کے احاطے میں فلسطینیوں اور اسرائیلی سکیورٹی اہلکاروں کے درمیان خوفناک جھڑپیں شروع ہو گئیں۔ صہیونی اہلکاروں نے جمعہ کی نماز پڑھ کر نکلنے والے نمازیوں پر ساؤنڈ بموں، آنسو گیس کے شیلوں کی بوچھاڑ کر دی۔
عرب پیرا میڈیکل سٹاف کی یونین کے مطابق ان جھڑپوں میں بیس کے قریب فلسطینی زخمی ہوئے جبکہ اسرائیلی فوج کے برسائے گئے آنسو گیس کے شیلوں سے مسجد اقصی کے مسقوف حصے کے اندر موجود ستر نمازیوں کے دم گھٹ کر رہ گئے اور وہ شدید تکلیف میں مبتلا رہے۔ اسرائیلی فوج کے سیکڑوں اہلکاروں نے نے نماز جمعہ ختم ہوتے ہی نمازیوں پر ہلہ بول دیا اور متعدد کو براہ راست تشدد کا نشانہ بنایا۔
نمازیوں کو منتشر کرنے کے لیے ساؤنڈ بموں اور اشک آور گیس کا بے دریغ استعمال کیا گیا جس کی زد میں آکر فلسطینی صحافی عطا عویسات بھی زخمی ہو گیا، عویسات کے چہرے پر ساؤنڈ بم کا شیل آکر لگا تھا ان کی حالت شدید خراب ہے۔ ساؤنڈ بم اور آنسو گیس کے شیل لگنے سے مزید دو فلسطینی صلاح اور فایز بھی زخمی ہوئے ہیں۔
قابض فوج کے برسائے گئے شیلوں سے مسجد کے مشرقی دروازے کو آگ لگ گئی، جس سے مسجد اقصی میں موجود نمازیوں میں شدید اشتعال پھیل گیا، تاہم مسجد سے اسرائیلی فوج کے جاتے ہی فائر بریگیڈ کے عملے نے موقع پر پہنچ کر آگ پر قابو پالیا۔
ذرائع کے مطابق حرم قدسی کے حطہ دروازے پر فلسطینی نوجوانوں نے اسرائیلی اہلکاروں پر پتھراؤ شروع کردیا جس پر دونوں جانب سے جھڑپیں شروع ہوئیں۔ فلسطینی نوجوانوں کے پتھراؤ سے ایک صہیونی فوج سر پر پتھر لگنے سے زخمی بھی ہوا۔
اسرائیلی پولیس نے عرب میڈیکل سروسز کے عملے کو مسجد اقصی کے صحن میں داخل ہونے سے روک دیا۔ فلسطینی زخمیوں کی مدد کو آنے والے عملے کو بھی مسجد میں داخل نہ ہونے دیا۔
بشکریہ:مرکز اطلاعات فلسطین