اسلامی تحریک مزاحمت ۔ حماس کی جانب سے جاری کردہ ایک رپورٹ کے مطابق تحریک فتح کے زیر انتظام کام کرنے والی فلسطینی اتھارٹی نے مغربی کنارے سے حماس کے 47 کارکنوں کو گرفتار کیا ہے۔
حماس اور فتح کے مابین مصالحت کے حوالے سے مثبت پیش رفت کی فضا ء میں یہ گرفتاریاں مفاہمت پر عمل درآمد کے حوالے سے بڑی رکاوٹ شمار کی جا رہی ہیں۔ تفصیلات کے مطابق جنوری کے مہینے میں اتھارٹی کی سکیورٹی فورسز نے حماس کے رہنماؤں اور کارکنوں کی پکڑ دھکڑ مہم تیز کردی۔
حماس کے مطابق گرفتار کیے جانے والوں میں سے اٹھائیس افراد اسرائیلی قید سے رہائی پانے والے ہیں جبکہ چار یونیورسٹی کے طلبہ ہیں۔ اسی طرح ایک ٹاؤن کونسل کے سربراہ کو بھی گرفتار کیا گیا ہے۔ اعداد و شمار کے مطابق سال 2013ء کے پہلے مہینے میں فلسطینی اتھارٹی نے مغربی کنارے سے 49 افراد کو تفتیش کے لیے طلب کیا ہے۔ اس طرح رہائی کے عدالتی احکامات کے باوجود تیرہ افراد کی مدت حراست میں توسیع کر دی گئی۔ حماس نے بتایا کہ گزشتہ ماہ اسرائیل نے بھی حماس کے آٹھ رہنماؤں کو رہا کیا ہے۔
بشکریہ:مرکز اطلاعات فلسطین