صہیونی عدالت نے مقبوضہ بیت المقدس کے تین شہریوں کو ایک سال بعد اپنے شہر واپس آنے کی اجازت دیدی ہے۔
ذرائع کے مطابق ان شہر بدر افراد کے نام یہ ہیں: اشرف زلوم، شادی زاہدہ اور طارق علیان۔ ان تینوں افراد پر صہیونی عدالت نے پابندی لگائی تھی کہ مقبوضہ بیت المقدس میں واقع اپنے گھروں میں نہیں رہ سکتے۔ جس کے بعد انہوں نے ایک سال سے زائد عرصہ شہر سے باہر مختلف علاقوں میں گزار دیا ہے۔
عدالت نے انہیں صہیونی ریاست کے لیے سیکورٹی رسک قرار دیا تھا، تاہم واپس آنے کے بعد بھی ان کی مسلسل نگرانی کی جائے گی۔ زلوم اور شادی زاہدہ کے اہل خانہ نے بتایا ہے
کہ وہ دونوں اپنے گھر پہنچ گئے ہیں، تاہم طارق علیان ابھی تک گھر نہیں پہنچے اور وہ ”صور باہر” نامی قصبے میں مقیم ہیں اور عنقریب گھر پہنچ جائیں گے۔
اسرائیلی عدالت نے مذکورہ تینوں افراد پر انٹرنیٹ استعمال کرنے کی پابندی لگائی ہے۔ یہ تینوں افراد شادی شدہ ہیں اور ان کے کئی بچے بھی ہیں۔ عدالت نے حکم نامہ جاری کیا ہے کہ وہ اپنے قریبی عزیزوں کے علاوہ کسی سے بھی نہیں مل سکتے۔
بشکریہ:مرکز اطلاعات فلسطین