اسلامی تحریک مزاحمت ۔ حماس کے سیاسی شعبے کے رکن عزت رشق کا کہنا ہے کہ حماس اور تحریک فتح کے مابین مفاہمتی معاہدے پر عمل کے میکنزم طے کرنے کے حوالے سے مذاکرات جمعرات کے روز مصری دارالحکومت قاھرہ میں ہورہے ہیں۔
ان مذاکرات کے دوران فلسطینی جماعتوں میں اختلافات ختم کرکے متحد کرنے کے حوالے سے طے پانے والے دوحہ اور قاھرہ میں ہونے والے مفاہمتی معاہدوں کی شقوں پر عمل کا ٹائم فریم بھی طے کیا جائے گا.
انہوں نے بتایا کہ اس ملاقات پر گزشتہ ہفتے مصر کی ثالثی میں خالد مشعل اور محمود عباس کی ملاقات میں اتفاق ہوا تھا۔ عزت رشق نے بتایا کہ اگلے ماہ کے شروع میں تنظیم آزادی فلسطین کا ھنگامی اجلاس طلب کیا جا سکتا ہے۔ اس اجلاس میں فلسطین کی تمام جماعتیں شریک ہونگی۔
انہوں نے دو ٹوک انداز میں کہا کہ حماس فلسطینی مصالحتی معاہدے پر جلد از جلد عمل درآمد کی خواہاں ہے اور وہ اس ضمن میں تمام رکاوٹوں کو جلد عبور کرنے کے لیے بے تاب ہے۔ اس مفاہمتی معاہدے کے تحت فلسطینی متحد حکومت کا قیام’ تنظیم آزادی فلسطین کی تشکیل نو’ فلسطینی عام انتخابات’ شہریوں کی بنیادی آزادیوں کی بحالی جیسے معاملات پر اتفاق ہوچکا ہے جن پر عمل درآمد ضروری ہے۔
بشکریہ:مرکز اطلاعات فلسطین