اسرائیلی عقوبت خانوں میں زیر حراست پانچ ہزار کے قریب فلسطینی اسیران پر ظلم و ستم کی خبریں آئے روز کا معمول ہیں، صہیونی جیل انتظامیہ نے نئی انسانیت سوز کارروائی کچھ اس طرح کی کہ مریض اسیران کو وہ دوائیاں فراہم کرنا شروع کر دی جو کتوں کے علاج کے لیے استعمال ہوتی ہیں۔
اسلامی تحریک مزاحمت ۔ حماس کے سیاسی شعبے کے رکن عزت رشق نے اسرائیلی جیلوں میں فلسطینی مریض اسیران کے علاج کے لیے کتوں کی دوائیوں کے استعمال کی شدید مذمت کی ہے۔
عزت رشق نے بدھ کے روز جاری کردہ اپنے بیان میں اسرائیلی جیلوں میں فلسطینیوں کے ساتھ جانوروں جیسے سلوک کو ایک غیر انسانی فعل قرار دیا اور کہا کہ اسرائیل نے تمام انسانی و اخلاقی کی حدود پھلانگ کر فلسطینیوں کے ساتھ جانوروں سے بھی بدتر سلوک شروع کر دیا ہے۔
حماس کے رہنما نے کہا کہ اسرائیل کا یہ قبیح فعل ان حلقوں اور طاقتوں کے منہ پر طمانچہ ہے جو صہیونی جرائم کی توجہیات پیش کرتے ہیں یا خاموش رہتے ہیں۔ انہوں نے کتوں کو دی جانے والی ادویات فلسطینی اسیران کو کھلانے کے باعث ہونے والے کسی بھی نقصان کی ذمہ داری اسرائیلی حکومت پر عائد کی۔ عزت رشق نے دنیا بھر کی انسانی حقوق کی تنظیموں سے اپیل کی کہ وہ اسرائیل کے اس جنگی جرم پر اس کا کڑا محاسبہ کریں۔
بشکریہ:مرکز اطلاعات فلسطین