مرکزاطلاعات فلسطین کے مطابق گزشتہ روز صہیونی بلدیہ اور پولیس کی ایک مشترکہ ٹیم نے قدیم بیت المقدس کی صوانہ کالونی میں فلسطینیوں کے گھروں پر چھاپے مارے۔
مقامی ذرائع کا کہنا ہے کہ صہیونی پولیس کی بڑی تعداد نے الصوانہ کالونی کو گھیرے میں لے لیا اور کچھ دیر کے لیے اس کے تمام داخلی اور خارجی راستے بند کردیے۔ اس دوران اسرائیل کی ضلعی حکومت کے اہلکاروں نے مقامی شہریوں میں مکانات خالی کرانے کے نوٹسز تقسیم کیے۔ فلسطینیوں کو بتایا گیا کہ انہوں نے یہاں پر مکانات غیر قانونی طور پر تعمیر کررکھے ہیں جو تجاوزات میں شامل ہیں۔ لہٰذا وہ جلد از جلد مکانات خالی کرکے انہیں خود ہی گرا دیں ورنہ انہیں فوج کے ذریعے بلڈوز کردیا جائے گا۔
خیال رہے کہ اسرائیلی حکام مقبوضہ بیت المقدس کے مقامی فلسطینی باشندوں کو وہاں سے نکال باہر کرنے کی مہم کئی سال سے جاری رکھے ہوئے ہیں۔ اب تک سیکڑوں فلسطینی خاندانوں کو ان کے گھروں سے محروم کیا جا چکا ہے۔ وقت گذرنے کے ساتھ صہیونیوں کی جانب سے فلسطینیوں کی جبری بے دخلی کا سلسلہ بھی زور پکڑتا جا رہا ہے۔
بشکریہ:مرکز اطلاعات فلسطین