الخلیل میں اسرائیلی سکیورٹی فورسز کے فلسطینی گھروں پر حملے، سابق اسیران سمیت متعدد گرفتار

الخلیل میں اسرائیلی سکیورٹی فورسز نے جمعرات کے روز بھی متعدد فلسطینی گھروں پر چھاپے مارے اور متعدد افراد کو حراست میں لے لیا۔ صہیونی اہلکاروں نے سابق اسیران اور صحافیوں کے گھروں پر بھی حملے کیے ۔ ذرائع کے مطابق اسرائیلی فوج نے جمعرات کی صبح معروف فلسطینی رہنما ھیمونی کے گھرپر دھاوا بولا اور ھیمونی کے بیٹے معاذ کو گرفتار کرکے نامعلوم مقام منتقل کر دیا ہے۔یاد رہے کہ معاذ کو اس سے قبل بھی متعدد مرتبہ گرفتار کیا جا چکا ہے۔ انہیں دو ماہ قبل ہی رہا کیا گیا تھا۔ دوسری جانب فلسطینی سابق اسیر احمد یسری عویوی کے گھر پر بھی صہیونی اہلکاروں کی بڑی تعداد حملہ آور ہوئی۔ اہلکاروں نے شدید سردی میں اہل خانہ کو دو گھنٹے تک گھر سے باہر کھڑا کیے رکھا اور ان سے تفتیش کرتے رہے۔ اس دوران احمد یسری کو گرفتار کر کے نامعلوم مقام منتقل کردیا گیا۔ معتز حرباوی، انس صدقی جعبہ کو بھی ان کے گھر پر چھاپے مار کر گرفتار کیا گیا۔دوسری جانب معروف فلسطینی دانش ور اور مصنف لمی خاطر کے گھر پربھی صہیونی سکیورٹی فورسز کے خصوصی دستے نے دھاوا بولا۔لمی خاطر اور انکے شوہر کو گھر سے نکال کر دیر تک سوال و جواب کیے جاتے رہے۔ ان سے حماس کی پچیسویں سالگرہ کی مناسبت سے نکالی جانے والی ریلی کے متعلق سوالات کیے گئے۔