اسرائیلی فوجی ذرائع کا کہنا ہے کہ غزہ کی پٹی کے مزاحمت کاروں نے بدھ کی شام اسرائیل کے جنوبی شہر نقب پر تین راکٹ داغے ہیں۔ اسرائیلی ذرائع ابلاغ کا کہنا ہے
کہ فلسطینی مجاہدین کی جانب سے برسائے گئے راکٹ دو یہودی بستیوں پر آ کر گرے۔
معروف اسرائیلی روزنامے ’’یدیعوت احرونوت‘‘ نے اپنی ویب سائٹ پر نشر خبر میں بتایا ہے کہ راکٹ حملوں کا نشانہ بننے والی علاقوں میں نتیفوت اور اشکول کی بستیاں شامل ہیں۔ ذرائع کے مطابق ان راکٹ حملوں میں کسی قسم کا جانی یا مالی نقصان نہیں ہوا۔
یاد رہے کہ گزشتہ چند روز سے چھ سال سے اسرائیلی محاصرے میں گھری غزہ کی پٹی پر اسرائیل متعدد بار حملے کر چکا ہے۔ اسرائیل کے ان حملوں میں درجنوں فلسطینی شہید اور زخمی ہوچکے ہیں۔ بدھ کی شام داغے گئے راکٹ بھی اسرائیل کے حالیہ حملوں کا رد عمل ہی بتائے جا رہے ہیں۔