اقصی فاؤنڈیشن برائے وقف و آثار قدیمہ کا کہنا ہے کہ عرب اور اسلامی دنیا میں نبی اکرم علیہ الصلوہ و السلام کی شان میں گستاخانہ فلم کیخلاف مظاہرے اسرائیل کے لیے یہ پیغام لیے ہوئے ہیں کہ قبلہ اول اور دیگر مقدسات مسلمانوں کے لیے ریڈ لائن ہیں۔
فاؤنڈیشن کے میڈیا ڈائریکٹر محمود ابو عطا نے خبر رساں ایجنسی ’’قدس پریس‘‘ سے گفتگو کرتے ہوئے بتایا کہ مسجد اقصی کے خلاف کوئی بھی جارحانہ اقدام پورے خطے کو مشتعل کردیگا جس کے بعد لاکھوں لوگ مسجد اقصی کے تحفظ کے لیے اسی طرح سڑکوں پرآ جائیں گے جیسا کہ آج کل شان رسالت کے تحفظ کے لیے دنیا بھر میں احتجاجی مظاہرے کیے جا رہے ہیں۔
اس موقع پر فاؤنڈیشن کے ترجمان ابو عطا نے عرب اور اسلامی دنیا سے اپیل کی کہ وہ اپنے قبلہ اول اور تیسری مقدس ترین مسجد ’’مسجد اقصی‘‘ کو یہودی رنگ میں رنگنے کی اسرائیلی کاررائیوں کے خلاف بھی احتجاج کریں اور اپنے قبلہ اول کی مدد کے لیے بھرپور جدوجہد کا آغاز کریں۔ ابو عطا نے اسرائیل کی جانب سے مسجد اقصی کے ڈائریکر ناجح بکیرات کی گرفتاری کی بھی شدید مذمت کی اور اس اقدام کو انتہائی ظالمانہ قرار دیا۔