اسرائیلی ذرائع ابلاغ کے مطابق مغربی کنارے کے شہر جنین میں یہودی آباد کاروں کی گاڑیوں پر نامعلوم افراد نے پٹرول بم برسائے ہیں۔ اطلاعات کے مطابق یہودیوں کی کاروں پر کم از کم دس گھریلو ساختہ پٹرول بم پھینکے گئے۔
اسرائیلی ریڈیو نے بتایا کہ گزشتہ رات گئے حملہ آور وں نے مرکزی شاہراہ سے گزرنے والی یہودی کاروں پر پٹرول بم پھینکنے کا سلسلہ شروع کیا تاہم کسی بھی کار کو زیادہ نقصان نہ پہنچا، اسرائیلی فورسز کو جیسے ہی حملوں کی اطلاع ملی وہ فورا جائے وقوعہ پر پہنچ گئیں جس کے بعد حملہ آور فرار ہوگئے۔
ادھر اسی شہر میں ایک اور مقام پر نامعلوم افراد نے مغربی کنارے کو 48ء کے مقبوضہ فلسطین سے الگ کرنے والی دیوار کے قریب قائم سیکورٹی ٹاور کے قریب دھماکہ خیز مواد نصب کرکے ایک دھماکہ کیا، تاہم اس اس دھماکے میں بھی کوئی بڑا جانی یا مالی نقصان نہ ہوا۔ واقعات کے بعد اسرائیلی فوج نے حملہ آوروں کی تلاش میں علاقے میں سرچ آپریشن شروع کردیا۔ ذرائع کے مطابق رام اللہ کے قریبی گاؤں المغیر سے ایک فلسطینی کو گرفتار کرلیا گیا۔ اسرائیلی فوج کا کہنا ہے کہ اس فلسطینی سے مقامی سطح پر بنائی گئی پسٹل برآمد ہوئی ہے۔
بشکریہ: مرکز اطلاعات فلسطین