اسرائیلی مظالم سے تنگ آ کر صہیونی عقوبت خانوں میں قید فلسطینی اسیران کی بڑی تعداد نے بھوک ہڑتال کا اعلان کر رکھا ہے۔ فلسطین بھر میں ان اسیران کے ساتھ اظہار یک جہتی میں مظاہروں اور دیگر سرگرمیوں کا انعقاد بھی جاری ہے۔
تاہم ایک حالیہ سروے کے اکثر شرکاء نے رائے دی ہے کہ فلسطینی قوم اور حکومت کی جانب سے اسیران کے حقوق کے حصول کے لیے اپنے بھوک ہڑتالی قیدیوں کے ساتھ ہم آہنگی کو بڑھانے کی اشد ضرورت ہے۔
سروے میں شریک 8462 افراد، 93 فیصد، نے رائے دی کہ فلسطینی قوم اور حکومت کی جانب سے اپنے اسیران کے ساتھ یک جہتی کو قابل اطمینان قرار نہیں دیا جا سکتا۔ دوسری جانب 07 فیصد نے رائے دی کہ بھوک ہڑتال کرنے والے اسیران کے مطالبات کو منوانے کے لیے ان کے ساتھ یک جہتی کے مظاہرے مطلوبہ سطح کے مطابق ہیں۔
قابل ذکر امر یہ ہے کہ اسرائیلی حکام نے حالیہ عرصے کے دوران فلسطینی اسیران پر مظالم بڑھا دیے ہیں۔ صہیونی جیل انتظامی کی بدسلوکی نے متعدد اسیران کو اپنے انسانی حقوق کے حصول کے لیے بھوک ہڑتال کرنے پر مجبور کردیا ہے۔
بھوک ہڑتالی اسیران کو ان کے حقوق دلوانے کے لیے مغربی کنارے اور غزہ میں فلسطینیوں نے مظاہروں کا سلسلہ شروع کیا ہے تاہم عوام کا خیال ہے کہ یہ مظاہرے مقصد کے حصول کے لیے ناکافی ہیں۔
بشکریہ: مرکز اطلاعات فلسطین