فلسطینی شہرغزہ کی پٹی میں اسرائیلی فوج کے جنگی جہازوں اور بری فوج کے ٹینکوں نے مشترکہ طور پر شہر پر بمباری کی ہے جس کے نتیجے میں کم سے کم دو افراد شہید اور متعدد زخمی ہو گئے ہیں۔
مرکزاطلاعات فلسطین کے مطابق صہیونی فوج نے بدھ کی شام غزہ کے شمال میں جنگی طیاروں اور توپخانے کے سےایک ساتھ حملہ کیا گیا، جس کے نتیجے میں سترہ سالہ احمد خالد زعانین اور تئیس سالہ محمد شاکر عودہ شہید ہو گئے۔
عینی شاہدین کے مطابق اسرائیلی فوج کے جنگی طیاروں نے جبالیا کے مشرق میں تلہ کے مقام پراچانک بمباری شروع کی۔ اسرائیلی جنگی جہازوں کے ذریعے کم سے کم تین میزائل داغے گئے۔ اس کے ساتھ ساتھ صہیونی بری فوج نے توپخانے کے ساتھ کم سے کم دس راکٹ فائر کیے دونوں فوجوں کے حملوں کا ہدف ایک ہی تھا۔
عینی شاہدین کا کہنا ہے کہ صہیونی فوج جبالیا کے مشرق میں فلسطینی مزاحمت کاروں کے ایک گروہ کو نشانہ بنایا تاہم مجاہدین محفوظ رہے۔ دو افراد کی شہادتیں آبادی والے علاقوں میں گولے گر کر پھٹنے سے ہوئی ہیں۔
صہیونی جنگی طیاروں کی فضاء میں مسلسل پروازوں کا سلسلہ جاری ہے اور اسرائیلی لڑاکا ہیلی کاپٹربھی مسلسل غزہ کی فضاء میں محو پرواز ہیں جس سے شہریوں کے خوف وہراس میں اضافہ ہو گیا ہے۔