اقوام متحدہ کی جنرل اسمبلی میں فلسطینیوں کے حق خود ارادیت کی ایک قرارداد بھاری اکثریت کے ساتھ منظورکر لی گئی ہے۔ دوسری جانب عالم اسلام کی نمائندہ "اسلامی تعاون تنظیم” او آئی سی” نے قرارداد کا خیر مقدم کیا ہے۔
مرکزاطلاعات فلسطین کے مطابق جمعرات کے روز نیویارک میں جنرل اسمبلی کے جلاس میں فلسطینیوں کے حق خود ارادیت کے بارے میں ایک قرارداد پیش کی گئی۔ قرارداد کے حق میں 182 ممالک نے رائے دی اور یوں یہ قرارداد بھاری اکثریت کے ساتھ منظوری کر لی گئی ہے۔
ادھر دوسری جانب "اوآئی سی” کے سیکرٹری جنرل پروفیسراکمل الدین احسان اوگلو نے جدہ میں تنظیم کے دفترسے جاری ایک بیان میں یواین میں فلسطینیوں کے حق خود ارادیت کو تسلیم کرنے کی قرارداد کا خیر مقدم کیا ہے۔
بیان میں کہا گیا ہے کہ جنرل اسمبلی میں فلسطینیوں کے حق خود ارادیت کی قرارداد کی منظوری صرف کسی ایک ملک کا گروپ کی کاوشوں کا نتیجہ نہیں بلکہ پورے عالم اسلام اور عالم عرب سمیت کئی بڑی انسانی حقوق کی تنظیموں کی مساعی کا ثمر ہے۔ اس قرارداد کے بعد مسئلہ فلسطین ایک مرتبہ پھر اقوام متحدہ کے ایجنڈے میں سرفہرست آ گیا ہے۔
اب اس کے بعد اقوام متحدہ کے پاس اس کے سوا اور کوئی چارہ باقی نہیں رہ جاتا ہے کہ وہ فلسطینیوں کو ان کے حق خود ارادیت کی قرارداد کے مطابق انہیں منصفانہ حقوق کی فراہمی میں اپنا کردار ادا کرے۔
او آئی سی کے سربراہ کا کہنا تھا کہ وہ فلسطینیوں کے جائز اور منصفانہ حقوق کی جنگ لڑتے رہیں گے۔ اقوام متحدہ کی بعض تنظیموں نے فلسطینی ریاست کو مستقل رکنیت دے دی ہے۔ اس کے بعد جنرل اسمبلی اور سلامتی کونسل کو بھی چاہیے کہ وہ فلسطینیوں کی درخواست پران کے لیے آزاد وطن کا جلد ازجلد اعلان کرے۔
پروفیسر اکمل الدین اوگلو نے فلسطینیوں کے حقوق کے لیے عالمی فورمز پر سفارتی میدان میں کردار ادا کرنے والے عرب، مسلمان اور دیگر ممالک کی مساعی کو سراہا اور جنرل اسمبلی میں فلسطینیوں کے حق خود ارادیت کی قرارداد کی حمایت کرنے پر ان کا شکریہ ادا کیا۔