اسرائیلی وزیر اعظم بنجمن نیتن یاھو کے مطابق حماس کے ہاتھوں گرفتار اسرائیلی فوجی گیلاد شالیت کی رہائی کے متعلق مذاکرات میں حماس نے مغربی کنارے سے تعلق رکھنے والے اپنے 100 خطرناک کارکنوں کی رہائی کا مطالبہ کیا ہے۔ نیتن یاھو کا کہنا ہے کہ وہ قیدی جن کی رہائی کا حماس مطالبہ کر رہی ہے انتہائی خطرناک ہیں، اس مطالبے پر عمل کا مطلب ہو گا کہ ان تحریب کاروں کو اسرائیل میں کسی بھی جگہ حملہ کرنے کی کھلی چھوٹ دے دی جائے۔ انہوں نے کہا کہ گیلاد شالیت کی خاندان کی جانب سے ان کی رہائی کی ذمہ داری تاحال ان کے کندھوں پر ہی ہے تاہم فی الحال وہ قوم کے 70 لاکھ افراد کی حفاظت کو ترجیح دے رہے ہیں۔ واضح رہے کہ منگل کی دوپہر گیارہ بجے لاکھوں اسرائیلی فوجیوں نے حماس کے زیر حراست صہیونی فوجی گیلاد شالیت کے ساتھ اظہار یک جہتی میں پانچ منٹ خاموشی اختیار کی۔ دوسری جانب بہت سی ویب سائٹس نے بھی چند منٹوں کے لیے گیلاد شالیت کے ساتھ اظہار یک جہتی میں کام کرنا بند کردیا۔ اس موقع پر اسرائیل کی کاروباری شخصیات سے بھی شالیت کی رہائی میں مدد کی اپیل کی گئی۔ واضح رہے کہ حماس نے 26 جون سنہ 2006ء گیلاد شالیت نامی اسرائیلی فوجی کو اغوا کر لیا تھا، جس کے بعد سے اسرائیل نے غزہ کا محاصرہ کرکے پندرہ لاکھ اہل غزہ پر زندگی کے راہیں مسدود کر رکھی ہیں تاہم پانچ سالہ معاشی ناکہ بندی کے باوجود حماس شالیت کی رہائی کو اسرائیلی عقوبت خانوں میں موجود فلسطینیوں کی رہائی سے مشروط کرتی چلی آ رہی ہے۔