اسرائیلی فوج نے الخلیل میں تین فلسطینی گرفتار کر لیے

اسرائیلی فوج نے مغربی کنارے کے سب سے بڑے ضلع الخلیل میں ایک کارروائی کر کے تین فلسطینی شہریوں کو گرفتار کر لیا جن میں سے ایک فلسطینی کچھ دیر قبل ہی عباس ملیشیا کی جیل سے رہا ہوا تھا۔ مقامی ذرائع کے مطابق اسرائیلی فوجی اہلکاروں کی بڑی تعداد نے 47 سالہ فواز ابو ارمیلہ کے گھر پر حملہ کر کے انہیں حراست میں لے لیا، انہیں اس سے قبل متعدد مرتبہ عباس ملیشیا بھی اغوا کر چکی ہے۔ وہ ایک ہفتہ قبل ہی تین ماہ تک عباس ملیشیا کے دردناک تفتیشی مراحل سے گزر رہا ہوئے تھے۔ ذرائع نے بتایا کہ عباس ملیشیا نے تین مرتبہ کے عدالتی احکامات کے باوجود انہیں رہا کرنے سے انکار کر دیا تھا تاہم اس مرتبہ انہیں رہا کیا گیا تو اسرائیلی فوج نے انہیں گرفتار کر لیا ہے۔ صہیونی فوج نے ایک کارروائی جبل ابورمان کے علاقے میں کی جہاں اس نے اسعد سعدی ابو عیشہ کو گرفتار کرلیا، ان کے گھر پر دھاوا بول کر زبردست توڑ پھوڑ بھی کی گئی، اسی طرح شہر کے جنوبی علاقے الفحص میں بھی اسرائیلی فوج نے متعدد گھروں پر حملے کیے ہیں۔ دوسری جانب بیت امر کے علاقے میں 30 سالہ شریف علی خلیل کی کار کو ایک چیک پوسٹ پر روکا گیا اور پھر انہیں حراست میں لے لیا گیا۔ اسرائیلی فوج نے حلحول بریج کے قریب بھی ایک فلسطینی کار پر فائرنگ کی تاہم گاڑی کا ڈرائیور بھاگنے میں کامیاب ہو گیا۔