مقبوضہ بیت المقدس – (روزنامہ قدس ـ آنلائن خبر رساں ادارہ) اسلامی تحریک مزاحمت ’حماس‘ نے قابض اسرائیل کی حکومت کے قومی سلامتی کے وزیر ایتمار بن گویر کے مبارک مسجد اقصیٰ کے صحنوں پر دھوا بولنے اور قبلہ اول کے سامنے مشرقی صحن میں تلمودی رسومات ادا کرنے کی شدید مذمت کی ہے، اور اسے مسجد کی شناخت کو نشانہ بنانے اور اس کے اندر نئے حقائق مسلط کرنے میں ایک خطرناک کشیدگی قرار دیا ہے۔
مقامی رپورٹس سے یہ ظاہر ہوا کہ بن گویر نے سخت سکیورٹی حصار میں مسجد اقصیٰ پر دھوا بولا، جبکہ صبح کے وقت ایک سو اٹھہتر یہودی آبادکاروں نے اس کے صحنوں پر دھاوا بولا۔
حماس نے ایک بیان میں کہا کہ بن گویر کی طرف سے مسجد اقصیٰ کے دھاووں کا اعادہ اور قبلہ اول کے قریب تلمودی رسومات کی ادائیگی قابض حکومت کی اس پالیسی میں خطرناک حد تک بڑھوتری کی عکاسی کرتی ہے جس کا مقصد مسجد اقصیٰ کو ناپاک کرنا اور اس کی یہودیتائزیشن کرنا ہے۔ اس نے قابض ریاست کے رہنماؤں کی طرف سے آنے والے اسرائیلی انتخابات سے پہلے کے مرحلے کو فلسطینی سرزمین، فلسطینی عوام اور مقدسات پر جارحیت کو تیز کرنے کے لیے استعمال کرنے کے خلاف خبردار کیا۔
حماس نے مزید کہا کہ مسجد اقصیٰ پر دھوا بولنا اس کی حرمت پر ایک صریح حملہ ہے، اور مسلمانوں کے جذبات اور امت مسلمہ کے نزدیک مسجد کے مقام اور تقدس کی کھلی توہین ہے، اور اس بات کی تصدیق کی کہ فلسطینی عوام اور مزاحمت اس عمل کے سامنے ہاتھ پر ہاتھ دھر کر نہیں بیٹھیں گے جسے اس نے "مقدسات کی بے حرمتی” قرار دیا۔
جماعت نے مقبوضہ بیت المقدس، اندرونی علاقوں اور مغربی کنارے میں اپنے عوام کے جم غفیر کو دعوت دی کہ وہ مسجد اقصیٰ کی طرف رخ کریں اور وہاں ڈیرے ڈالیں، مقدسیوں اور وہاں رباط کرنے والوں کے عزم کو سہارا دیں، اور تقسیم اور یہودیتائزیشن مسلط کرنے کے ناپاک منصوبوں کا منہ توڑ جواب دیں۔
اس نے عرب اور اسلامی ممالک اور عالمی برداری سے بھی یہ مطالبہ کیا کہ وہ اپنی ذمہ داریاں اٹھائیں، مسجد اقصیٰ کے خلاف جاری خلاف ورزیوں کو روکنے کے لیے فوری طور پر حرکت میں آئیں، اور قابض ریاست کے رہنماؤں کا اس پر احتساب کریں۔
بن گویر کا یہ دھوا سنہ 2026 کے دوران مسجد اقصیٰ کے اندر دھاووں اور یہودی رسومات کی رفتار میں واضح اضافے کے تناظر میں سامنے آیا ہے۔ تازہ ترین رپورٹس یہ بتاتی ہیں کہ یہ طرزِ عمل عام یہودی آبادکاروں کے دھاووں سے آگے بڑھ کر اسرائیلی وزراء اور ذمہ داروں کی براہ راست اور بار بار شرکت تک پہنچ چکا ہے، جو کہ مسجد کے اندر نئے حقائق مسلط کرنے کی کوششوں کے ساتھ ہو رہا ہے۔
مقدس ذرائع کے مطابق، بن گویر اپنے عہدے کا حلف اٹھانے کے بعد سے اب تک انیس بار مسجد اقصیٰ پر دھوا بول چکے ہیں، جبکہ حالیہ مہینوں میں مسجد کے صحنوں نے تلمودی دعاؤں، عبادات کی ادائیگی اور اسرائیلی پرچم لہرانے کے مناظر دیکھے ہیں، اور اس دوران فلسطینیوں کی طرف سے خبردار کیا گیا ہے کہ یہ سب کچھ مسجد میں موجودہ صورتحال کو تبدیل کرنے کی طرف دھکیلنے کے مترادف ہے۔
موجودہ پیش رفت اکتوبر سنہ 2026ءکے آخر میں طے شدہ کنیست کے انتخابات کی قربت کے ساتھ اضافی اہمیت اختیار کر رہی ہے، کیونکہ سیاسی تجزیے یہ بتاتے ہیں کہ دائیں بازو اور مذہبی صویونیت کے دھڑے کی طرف سے انتخابی مقابلے میں مسجد اقصیٰ کو ایک ایسا حربہ بنایا جا رہا ہے جسے وہ استعمال کر رہے ہیں، اور اس دھڑے کے اندر مسلسل مطالبات کیے جا رہے ہیں کہ موجودہ صورتحال کو تبدیل کیا جائے اور مسجد پر مزید اسرائیلی کنٹرول مسلط کیا جائے۔
یہ پیش رفت ان وسیع دھاووں کے بعد سامنے آئی ہے جن کا مشاہدہ جولائی کے مہینے میں مسجد اقصیٰ میں کیا گیا تھا، جو اسرائیل کے ہاں نام نہاد "ہیکل کی بربادی کی برسی” کے ساتھ مطابقت رکھتے تھے، اور جن میں یہودی رسومات اور نمازیوں کے داخلے پر سخت پابندیاں دیکھی گئی تھیں، جس نے مسجد اقصیٰ کی زمانی اور مکانی تقسیم کو تقویت دینے کے بارے میں شدید خدشات کو جنم دیا تھا۔
