بن گویر کی اسیران سے ملاقاتوں پر پابندی، تشدد اور غیرانسانی سلوک مزید سنگین ہونے کا خدشہ

رام اللہ – (روزنامہ قدس ـ آنلائن خبر رساں ادارہ) کلب برائے امور اسیران نے خبردار کیا ہے کہ قابض اسرائیلی عقوبت خانوں میں اسیروں کے اہل خانہ کی ملاقاتوں پر پابندی کے حکم کی تجدید کا مقصد اسیروں کے خلاف تشدد اور بھوک کی گھناؤنی وارداتیں جاری رکھنا اور بیرونی دنیا سے ان کے رابطے پر پابندی کی پالیسی کو مزید مستحکم کرنا ہے۔

کلب نے اپنے ایک بیان میں واضح کیا کہ قابض صہیونی وزیرِ قومی سلامتی ایتمار بن گویر کی طرف سے ملاقاتوں پر پابندی کی تجدید کا اعلان کوئی حیران کن بات نہیں تھی، بلکہ یہ ایک ایسی منظم پالیسی کا تسلسل تھا جو اسیروں کو مکمل طور پر تنہا کرنے پر مرکوز ہے۔

کلب نے کہاکہ یہ فیصلہ جیلوں کو ایسی بند فضاؤں میں تبدیل کر دیتا ہے جہاں نگرانی اور احتساب سے دور رہ کر تشدد، بھوک، سست موت اور دنیا سے غائب کرنے کے جرائم کا ارتکاب کیا جاتا ہے، جو کہ فلسطینی اسیروں کے خلاف انتہائی خطرناک خلاف ورزیوں کا سلسلہ جاری رکھنے کے لیے ایک ڈھال فراہم کرتا ہے۔

اس نے اس بات کی طرف توجہ مبذول کرائی کہ پابندی کے حکم کی تجدید اس اسرائیلی سپریم کورٹ کے فیصلے کے فورا بعد سامنے آئی جس نے اسیروں سے ملاقات کرنے سے ریڈ کراس کی بین الاقوامی کمیٹی کو مسلسل روکنے کو ایک غیر قانونی اقدام قرار دیا تھا۔

اس نے اس بات پر بھی زور دیا کہ عدالت کا یہ فیصلہ اسیروں کی زمینی حقیقت پر اثر انداز نہیں ہوا، کیونکہ قابض صہیونی حکام نے اسیروں کے اہل خانہ کو ان سے ملنے سے روکنے کے حکم کی تجدید کے ساتھ ساتھ ریڈ کراس کو بھی ملاقاتوں سے محروم رکھنا جاری رکھا۔

کلب نے اس امر کو تسلیم کیا کہ یہ اس بات کی ایک بار پھر تصدیق کرتا ہے کہ قابض دشمن کے ادارے ایک ہی پالیسی کے تحت کام کر رہے ہیں، جن کا مقصد ایک ایسا ماحول فراہم کرنا ہے جو اسیروں کے خلاف جرائم کے تسلسل کو یقینی بنائے، اور بیرونی دنیا سے ان کی تنہائی کو طوالت بخشے، جو کہ ان کے حالات پر عملی نگرانی کو ناممکن بناتا ہے۔

اس نے واضح کیا کہ ظالمانہ حکم کی تجدید انتقامی اور عذاب دینے والی پالیسیوں کے ایک وسیع سلسلے میں ایک نئی کڑی کی حیثیت رکھتی ہے جسے قابض دشمن نے نسل کشی کے آغاز سے ہی انتہائی تیز کر دیا ہے، تاکہ اسیروں کو مکمل طور پر تنہا کیا جا سکے اور جیلوں کے اداروں کو مزید جرائم اور خلاف ورزیوں کے ارتکاب کے لیے کھلی چھٹی دی جا سکے۔

اس نے مزید کہا کہ تب سے جیلیں منظم تشدد، بھوک، ذلت، جان بوجھ کر طبی غفلت، جنسی تشدد، جبری گمشدگی اور سست موت پیدا کرنے کے لیے ایک مربوط نظام میں تبدیل ہو چکی ہیں، جو فلسطینی اسیروں کے خلاف خلاف ورزیوں کا ارتکاب کرنے والے نمایاں ترین میدانوں میں سے ایک بن چکی ہیں۔

اسی ضمن میں، کلب برائے اسیران نے حال ہی میں مغربی کنارے میں ریڈ کراس کی بین الاقوامی کمیٹی کے عملے کے ساتھ ملاقاتوں کا ایک سلسلہ منعقد کیا، جن میں نسل کشی کے آغاز سے کمیٹی کے کردار کے معطل ہونے کے مضمرات پر بحث کی گئی، اس کے علاوہ ان مشاہدات پر بھی گفتگو کی گئی جو مختص اداروں کی طرف سے اس کے اپنے انسانی فرائض کی انجام دہی کی صلاحیت میں کمی کے بارے میں پیش کیے گئے تھے۔

ملاقات میں ان اقدامات پر بھی بحث کی گئی جو قابض صہیونی حکام کی طرف سے بین الاقوامی اداروں کے کردار کو کمزور کرنے کے لیے اختیار کیے جاتے ہیں، جن میں سرفہرست ریڈ کراس ہے، اور اسے اسیروں تک پہنچنے سے روکنا ہے، تاکہ میدانی نگرانی اور آزادانہ دستاویز کاری کے فقدان کے سائے میں خلاف ورزیوں کا تسلسل ممکن ہو سکے۔

کلب نے ملاقاتوں کے دوران ریڈ کراس سے مطالبہ کیا کہ وہ ایک باضابطہ اور واضح موقف جاری کرے جو عالمی برادری کو اس حقیقت کے سامنے لا کھڑا کرے کہ قابض دشمن اس اسرائیلی سپریم کورٹ کے فیصلے کے باوجود اسیروں سے ملنے سے بین الاقوامی کمیٹی کو مسلسل روک رہا ہے، اور ان رکاوٹوں اور اقدامات کا کھل کر انکشاف کرے جو قابض دشمن اپنی انسانی ذمہ داریوں کی ادائیگی سے اسے روکنے کے لیے مسلط کرتا ہے۔

اس نے کمیٹی سے پرزور اپیل کی کہ وہ اسیروں کے اہل خانہ کو اپنے بیٹوں سے ملنے کے حق سے محروم رکھے جانے کے تسلسل کا باقاعدہ اعلان کرے، کیونکہ یہ بین الاقوامی انسانی قانون، جنیوا کنونشنز اور ان تمام قانونی اصولوں کی ایک سنگین اور منظم خلاف ورزی ہے جو اسیروں اور قیدیوں کے تحفظ کی ضمانت دیتے ہیں۔

نسل کشی کے آغاز سے ہی، قابض صہیونی حکام نے اسیروں سے متعلق استثنائی احکامات اور اقدامات کا ایک وسیع سلسلہ مسلط کیا تھا، جن میں سب سے نمایاں ان کے اہل خانہ کو ملاقاتوں سے روکنا تھا۔

اسرائیلی کنیسٹ (پارلیمنٹ) نے قوانین اور قانونی مسودات کا ایک ایسا پیکج منظور کیا جس نے تشدد، بھوک، تنہائی اور اسیروں کے بنیادی حقوق سلب کرنے کے لیے ایک قانونی ڈھال فراہم کی، اور جیلوں کو نگرانی اور احتساب سے کٹی ہوئی تنہا جگہوں میں بدل دیا۔

کلب نے ان اقدامات کو ایک مربوط پالیسی کے ساتھ جوڑا جس کا مقصد فلسطینی اسیروں کے خلاف خلاف ورزیوں کو پختہ کرنا اور بین الاقوامی معاشرے سے ان کے اثرات کو چھپانا ہے۔

اس نے اس بات پر زور دیا کہ عالمی برادری کا ان جرائم کے ساتھ عملی اور باز رکھنے والے اقدامات کے بغیر برتاؤ جاری رکھنا ہی قابض دشمن کو تنہائی، تشدد، بھوک اور سست موت کی پالیسیوں کو جاری رکھنے پر جرات دلاتا ہے، اور سزا سے بچ نکلنے کے کلچر کو راسخ کرتا ہے۔

اس نے اس بات کی تأکید کی کہ اسیروں کو ان کے اہل خانہ کے ساتھ رابطے سے محروم رکھنا اور ریڈ کراس کو ان تک پہنچنے سے روکنا اب ان کے بنیادی حقوق کی خلاف ورزی سے بڑھ کر فلسطینی اسیروں کے خلاف جاری تنہائی اور خلاف ورزیوں کے نظام کا ایک حصہ بن چکا ہے۔

کلب نے فوری بین الاقوامی مداخلت کا مطالبہ کیا جو قابض دشمن پر تنہائی کی پالیسی ختم کرنے، فوری طور پر ملاقاتیں بحال کرنے، اسیروں کے تحفظ کی ضمانت دینے، اور ان کے خلاف ہونے والی خلاف ورزیوں کے ذمہ داروں کو بین الاقوامی انصاف کے تقاضوں کے سامنے کٹہرے میں لانے کے لیے دباؤ ڈالے۔

اسیران کے میڈیا آفس کے مطابق قابض دشمن کی جیلوں میں اسیروں کی کل تعداد 9400 ہے، جن میں 94 اسیر خواتین، 350 بچے، 3244 انتظامی قیدی (بغیر کسی الزام کے قید افراد)، نام نہاد غیر قانونی جنگجو کے قانون کے تحت 1320 قیدی شامل ہیں، جبکہ غزہ پر جنگ کے آغاز سے لے کر اب تک گرفتاریوں کے کل کیسز کی تعداد 24600 سے تجاوز کر چکی ہے۔