جنوبی شام – (روزنامہ قدس ـ آنلائن خبر رساں ادارہ) قابض اسرائیلی فوج نے شام کے صوبہ درعا کے مغربی دیہی علاقے حوض اليرموك میں واقع بلدہ عابدين کے اطراف پر پانچ توپ خانے کے گولے داغے۔
شامی سرکاری خبر رساں ایجنسی "سانا” کے مطابق اس گولہ باری کا ہدف بلدہ عابدين کے گردونواح کا علاقہ تھا جبکہ اس حملے میں کسی قسم کے جانی نقصان یا مادی نقصان کی کوئی اطلاع موصول نہیں ہوئی۔
اس واقعے سے ایک روز قبل قابض فوج نے تل أبو الغيثار کے علاقے سے پیش قدمی کرتے ہوئے درعا کے مغربی دیہی علاقے میں وادی الرقاد کے اطراف میں ایک فوجی دراندازی کی کارروائی کی تھی جس کے دوران علاقے پر فائرنگ بھی کی گئی تاہم کوئی جانی یا مادی نقصان ریکارڈ پر نہیں آیا۔
قابض اسرائیلی فوج جنوبی شام میں مسلسل فوجی دراندازیوں، شہریوں کے گھروں پر چھاپے مارنے، لوگوں کو گرفتار کرنے،زمینوں کو ہموار کرنے اور گولے برسانے کے ذریعے سنہ 1974ء کے جنگ بندی معاہدے کی مسلسل خلاف ورزی کر رہی ہے۔
شام کی طرف سے مسلسل یہ مطالبہ کیا جاتا رہا ہے کہ قابض اسرائیل اس کی سرزمین سے انخلا کرے جبکہ یہ بھی واضح کیا گیا ہے کہ قابض ریاست کے تمام اقدامات باطل، کالعدم اور بین الاقوامی قانون کے تحت کسی بھی قانونی اثر سے خالی ہیں۔ اس کے علاوہ شام عالمی برادری سے یہ اپیل بھی کرتا ہے کہ وہ اپنی ذمہ داریوں کو محسوس کرے اور اسرائیل کو جنوبی شام سے مکمل انخلا کرنے پر مجبور کرے۔
