غزہ – (روزنامہ قدس ـ آنلائن خبر رساں ادارہ) غزہ کی پٹی میں فلسطینی وزارتِ صحت نے طبی عملے اور صحت کی تنصیبات کو مسلسل نشانہ بنانے کی شدید مذمت کی ہے اور قابض اسرائیل کی جانب سے طبی ماہرین پر ڈھائے جانے والے مظالم کو فوری طور پر روکنے کا مطالبہ کیا ہے۔
جمعہ کو قابض اسرائیل کے ایک ڈرون ’کواڈ کاپٹر‘ نے کمال عدوان ہسپتال پر ایک دھماکہ خیز بم گرایا، جس کے نتیجے میں ہسپتال کے اندر موجود دو کارکن زخمی ہو گئے۔ یہ حملہ ایک ایسے وقت میں کیا گیا جب وہ ’گرین زون‘ (محفوظ علاقے) میں موجود تھے۔
وزارت نے ایک پریس بیان میں اس بات پر زور دیا کہ طبی تنصیبات اور طبی عملے کو منظم انداز میں مسلسل نشانہ بنانا کارکنوں اور مریضوں کی زندگیوں کو شدید خطرے میں ڈال رہا ہے، اور اس سے صحت کے نظام کی جان بچانے والی خدمات فراہم کرنے کی صلاحیت تباہ ہو رہی ہے۔
وزارت نے اقوام متحدہ، بین الاقوامی اور انسانی حقوق کی تنظیموں اور متعلقہ فریقین سے اپیل کی ہے کہ وہ صحت کی تنصیبات اور طبی عملے کو فوری تحفظ فراہم کریں اور ان حملوں کو روکنے اور صحت کے شعبے کے خلاف جاری خلاف ورزیوں کا خاتمہ کرنے کے لیے عملی اقدامات کریں۔
غزہ کے سرکاری میڈیا آفس کی طرف سے جاری کردہ تازہ ترین اعداد و شمار کے مطابق، قابض فوج نے نسل کشی کی جنگ کے دوران غزہ کی پٹی میں 38 میں سے 34 ہسپتالوں کو تباہ کر دیا ہے۔ اس وقت صرف چار ہسپتال انتہائی محدود وسائل کے ساتھ کام کر رہے ہیں، جبکہ ادویات اور طبی آلات کی شدید قلت کا سامنا ہے۔
